DILI, STLTIMORLESTE.com – Relasiona ho krime Violensia Domestika neebe kada loron numeru kontinua aumenta, Jurista konsidera vitima balu sei taka ibun ba krime refere, maibe tuir lo-loos tenke barani koalia sai violensia neebe hasoru.
“Ita haree lei iha ona atu regula kona-ba aktu violensia domestika, iha vitima balu neebe hasoru violensia nee balu barani hatoo keixa no koalia sai, maibe balu la barani, tanba nee tuir lo-loos tenke barani koalia sai hodi hatoo keixa,” dehan Jurista Jose Maria Guterres ba STL iha Kaikoli, Sesta (05/12/2025).
Tuir nia, publiku balu sei konsidera violensia domestika hanesan problema uma laran, tanba nee banhira hasoru violensia domestika sira sente baibain deit, la barani hato’o keixa. Maibe tuir lo-loos entidade sira tenke sosializa lei nee too iha baze, atu ema bele iha konhesimentu kona-ba lei nee, nunee wainhira hasoru Violensia Domestika sira bele hatoo keixa.
Nia argumenta, importante mak sosializa lei nee ba iha baze, atu nunee halo prevensaun, labele konsidera krime Violensia Domestika hanesan buat kiik, tanba nia mos bele kauza sai krime boot.
“Vitima sira neebe hasoru violensia domestika labele tauk hodi hatoo keixa, tanba hatoo keixa laos hatodan ema neebe Ministeriu Publiku akuza, maibe atu hanorin fo hanoin halo prevensaun atu iha futuru labele akontese tan,” dehan nia.
Tuir observasaun STL nian, krime Violensia Domestika kontinua rejista makaas iha Tribunal Dili, no iha krime nee mane barak maka sai arguidu.
Nunee, kastigu neebe Tribunal aplika, Tribunal tetu sirkunstansia sira hotu molok deside tuir grau ba krime neebe iha. Balu iha desizaun hetan suspensaun, balu hetan pena multa, no balu hetan pena admoestasaun.
Jornalista: Terezinha De Deus
Editor: Xisto Mendonça
