BAGUIA, STLTIMORLESTE.com – Motorista balu preokupa projetu reabilitasaun estrada diresaun Laga-Baguia, tanba kompanhia servisu liu ona kontratu, maibe projetu nee sidauk finaliza.
Motorista Filipe Anrade Alvea, husi Suku Bahatata, Munisipiu Vikeke neebe viajen ho motorizada liu husi estrada diresaun Laga-Baguia agradese ba Governu, tanba kontratu ona kompanhia internasional hodi halo reabilitasaun ba estrada diresaun Laga-Baguia neebe fo benefisiu mos ba komunidade sira husi Munisipiu Vikeke, liu liu komunidade sira husi Postu Administrativu Uatulari no Uatukarabau, tanba husi Uatulari no Uatukarabau ba Dili no Baukau liu husi estrada diresaun Laga-Baguia besik liu kompara ho estrada diresaun Vikeke Vila-Baukau.
“Hau husi Suku Bahatata, hau nia hanoin konstrusaun estrada nee diak ona,,maibe iha tempu udan nee mak ami motorista sira sente la diak oituan, tanba tahu motor monu ami tula malu mos la diak, maibe hau hanoin neineik neineik ita nia estrada nee too Baguia nee diak ona,” Filipe hateten ba STL, iha Lavateri, Baguia, Tersa (09/12/2025).
Tuir nia, projetu reabilitasaun estrada Laga-Baguia iha tempu udan difikulta motorista sira neebe konduz motorizada, tanba estrada refere husi area Suku Sagadate, Postu Laga too iha Baguia Vila kompanhia seidauk fo progresu diak, tanba estrada sira neebe kee parte kompanhia foin ateru deit ho rai iha neebe tempu udan difikulta tebes motorizada sira, tanba rai kois.
Nia sublina, mezmu projetu estrada refere husi Suku Sagadate too Baguia Vila seidauk iha progresu fiziku diak, maibe bainhira finaliza sei fo vantajen movimentasaun ba komunidade sira ho transporte publiku no privadu.
Maibe Filipe mos preokupa liu tan ho projetu nee, tanba tuir kontratu neebe iha durasaun implementasaun servisu tinan 2, maibe servisu liu ona tinan 2 projetu refere seidauk finaliza.
“Hau rona dehan projetu nee lao durante tinan 2 nia laran, maibe liu ona husu sira hanoin ami sira komunidade husi Baguai too iha area Vikeke nian,,ami hotu hotu liu husi dalan ida nee entaun estrada nee presiza diak lalais,” Filipe komenta.
Vikeke oan nee husu Ministeriu Obras Publikas atu kontinua hakbesik aan no akompanha parte kompanhia nia servisu iha terenu, nunee bele hatene probemas sira hodi solusiona no aselera projetu refere, tanba servisu liu ona tinan 2, maibe servisu seidauk finaliza.
Liga asuntu nee STL tenta konfirma koordenador tekniku Obras Publikas Destakadu Munisipiu Baukau, maibe la fo komentariu, tanba projetu nee monitoriza husi Diresaun Nasional Konstrusaun de Vias Rodaviaria iha Raikotu Dili.
Mezmu nunee, tuir observasaun STL nian iha terenu nota katak, parte kompanhia nahe ona alkatraun husi area Laga Vila too ona iha area Teloidae, no faze preparasaun ba nahe alkatraun besik ona too Suku Atelari Postu Laga.
Jornalista: Tomas Reis
Editora: Carme Ximenes
