BAUKAU, STLTIMORLESTE.com – Profesores sira iha eskola Ensinu Baziku Sentral (EBC) Vila Nova Baukau ho nia Filial sira, realiza natal hamutuk neebe iha sentidu atu hametin fraternidade umana.
Diretor Eskola EBC Vila Nova, Francisco Pinto hateten, objetivu husi Natal hamutuk atu hanoin hikas kosok oan jesus kristu nia moris iha belem, tanba nee festeza natal hamutuk iha sentidu, atu hadomi malu no iha mos esperansa hametin unidade haburas espiritu hanesan maun alin.
“Nee mak ohin loron ita hamutuk iha nee hamutuk ita nia solidariedade ba malu, iha Edukasaun liu liu iha EBC Vila Nova Baukau, hatudu ita nia fraternalmente umana hahu agora ba oin ita komprende saida mak fraternidade umana,” Francisco hateten liu husi diskursu bainhira natal hamutuk, iha EBC Vila Nova Baukau, Tersa (09/12/2025).
Nia esplika, fraternidade umana laos domin husi ema ida ba ema ida deit, maibe fo domin ba sosiedade liu liu iha entre relizioju, oh objetivu ida nee mak EBC Vila Nova realiza natal hamutuk, nuudar pasu ida ba manorin nain sira atu hamutuk hametin no hadia pas estabilidade iha nivel eskola.
“Ida nee para ita hatene saida mak natal, tanba natal ita ba misa reza, maibe husi ida nee ita nafatin hamutuk mak ita bele hanoin hikas aplika iha ita nia eskola,” Francisco katak.
Iha fatin hanesan, Xefe Departamentu Jestaun Programa edukasaun, Servisu Munisipal Edukasaun Baukau, Adolfo de Jesus Freitas konsidera atividade nee importante tebes, no liu husi atividade natal hamutuk bele hametin relasaun profesores sira iha nivel eskola no iha sosiedade.
“Atividade sira nee ita halo fiar iha Maromak hatudu iha ita nia moris loro-loron atende ita nia maun alin sira, atu nunee Maromak nafatin prezensa mai ita, entuan ita nuudar edukador husu para ita nia servisu nee diferente ho instituisaun sira seluk,” Adolfo argumentu.
Enkuantu Veteranu tinan 24 Fernando Beredu’u Gusmão atual Konsilheiru EBC Vila Nova, agradese ba profesores sira iha eskola EBC Vila Nova Baukau, tanba bele inisiativa realiza natal hamutuk, maibe husu atu nafatin kuida edifisiu eskola, tanba eskola EBC Vila Nova Baukau harii ho prosesu moruk liu husi kobransa osan harii hodi kompleta eskola refere.
“Ami hakarak husu kuidadu eskola, uluk mestri sira mak fo uluk osan estudante nia inan aman fo US$ 10 ho ida nee mak, ami halo eskola ida nee moru haleu agora diak fali ona eskola seguru mak ita nia oan sira eskola, entaun eskola ida nee seguru ita hotu hamutuk,”Beredu’u katak.
Konsilheiru eskola EBC Vila Nova nee husu profesores sira, atu kontinua kria amizade ho estudante sira, nunee garante nafatin seguru eskola nian ba tinan naruk.
Entretantu natal hamutuk iha eskola EBC Vila Nova Baukau, hetan partisipasaun masimu husi profesores no koordenador eskola filial sira.
Jornalista: Tomas Reis
Editora: Carme Ximenes
