BAUKAU, STLTIMORLESTE.com – Membru Konselhu Konsultivu Munisipal (KKM) iha Munisipiu Baukau fo votus sekretu ba Suku Uaitame, neebe kontinua mantein iha Postu Administrativu Kelikai Antigu, enkuantu Suku Abafala kontinua iha Postu Administrativu Kelikai, Munisipu Baukau.
Prezidente Autoridade Munisipiu Baukau, Veneranda Lemos hateten, prosesu fahe Postu Administrativu Kelikai ba postu 3 hanesan Postu Matebian, Kelikai no Kelikai Antigu prosesu sira hahu kedas husi VIII Governu Konstitusional no prezensa IX Governu Konstitusional halo konfirmasaun ba komunidade sira, mak liu husi Ministeriu Administrasaun Estatal husu Autoridade Munisipiu Baukau atu kontinua prosesu halo konsulta ba komunidade sira, tanba komunidade sira husi Suku 2 hanesan Suku Abafala no Uaitame neebe pertense ba Postu Kelikai Antigu balu hakarak mantein iha Postu Kelikai no balu hakarak iha Postu Kelikai Antigu.
Nunee durante tinan ida liu ba Autoridade Munisipiu Baukau hamutuk ho Diretor Jeral Dezentralizasaun Governu Lokal no Diretores Nasional seluk tan, halo ona aprosimasaun ho komunidade no Autoridade sira iha Suku 2 refere tur hamutuk, atu deside destinu Suku 2 refere atu hamutuk ho Postu Kelikai ou Kelikai Antigu, maibe laiha rezultadu, tanba nee Autoridade Munisipiu iha dalan atu desidi, nunee aprezenta iha Konselhu Konsultivu Munisipal hodi deside hamutuk.
Tanba Konselhu Konsultivu Munisipal mak Konselhu aas liu iha Autoridade Munisipiu, atu foti desizaun ba hotu-hotu ninia hakarak.
“Konselhu ida nee ohin dade kedas ami tama husu kedas halo aprezentasaun ba kondisaun husi Suku 2 nee ninian ba Postu 2 ba Postu Kelikai Antigu nomos Postu Kelikai, ohin membrus hotu-hotu konkorda halo votasaun sekretu hatudu sira nia votu responsabilidade ba Suku 2 nee em fim rezultadu sai mai Suku Uaitema ba Postu Kelikai Antigu deside ho 33 votus. Suku Abafala liu husi votasaun demokratiku sira deside Suku Abafala ba Postu Kelikai ho votus 33,” Veneranda informa ba jornalista sira, hafoin remata sesaun KKM iha salaun apuramentu Vila Nova, Baukau, Tersa (09/12/2025).
Sesaun vota ba Suku Uaitame ho membru nain 62 neebe votus 33 ba Suku Uaitame, mantein iha Postu Kelikai Antigu no sesaun vota ba Suku Abafala membru nain 63 neebe votus 33 lori Abafala ba Postu Kelikai.
Veneranda konsidera, prosesu vota ho sesaun demokratiku tebes laiha ema ida interven, maibe votasaun hotu tuir votante sira nia konsiensia ba Suku 2 refere.
“Vota nee ema ida vota ida ho rezultadu ida nee Konselhu Konsultivu Munisipal liu husi Autoridade Munisipal sei relata ba Ministeriu Administrasaun Estatal katak, iha prosesu diskusaun votasaun halo ona dezisaun ba Suku 2 nee atu hela iha Postu Administrativu ida neebe,” PAM Baukau nee akresenta .
Nia deklara, rezultadu votasaun ba Suku 2 refere iha Konselhu Konsultivu Munisipal, Autoridade Munisipiu Baukau sei aprezenta ba Ministeriu Administrasaun Estatal hodi deside Suku 2 refere pertense ba Postu Administrativu neebe loos.
Maibe durante sesaun votasaun ba Suku 2 refere lao iha komunidade balu husi Suku Uaitema deklara, iha resintu salaun apuramentu Vila Nova Baukau la aseita atu hamutuk iha Postu Administrativu Kelikai Antigu.
“Aseita la aseita nee normal hanesan mos baibain ita halo votasaun ba eleisaun sira barak mos la konkorda, mais votasaun maioria mak desidi importante mak prosesu hotu demokratiku laiha prosesu ida intimidasaun, se la konkorda dalan legal iha, mais Suku tenke deside nia aan atu hamrik iha Postu neebe para labele fo prejudikasaun ba komunidade sira liu liu jovem sira,” dehan Veneranda.
Jornalista: Tomas Reis
Editora: Carme Ximenes
