DILI, STLTIMORLESTE.com – Governu Australia liu husi Timor Leste Development Partners (TLPD) nomos Federal Police (AFP) ho komitmentu apoiu hodi entrega mobile Closed Circuit Television (CCTV) ba iha Polisia Nasional Timor Leste (PNTL), hodi kontrola problema krime sira iha Dili laran.
Ministru Interior (MI), Francisco da Costa Guterres dehan, inisiativa Governu Australia apoiu ekipamentu teknologia hirak nee, hafoin nia halao enkontru ho TLPD no AFP neebe iha kooperasaun metin tebes.
Governante nee husu ba PNTL atu kuidadu didiak ekipamentu hirak neebe parseiru Australia apoiu, nunee ba oin bele utiliza ho tempu naruk, nunee bele monta iha fatin sira iha Dili laran, hodi fasil kontrola.
Nia katak, durante nee PNTL iha difikuldade tebes, bainhira mosu problema krime sira iha Dili laran susar atu detekta autor sira, nunee ho apoiu mobile CCTV nee espera katak, lalais detekta bainhira mosu krime.
“Mobile CCTV nee sira apoiu ba PNTL neebe mak bolu katak, camera kontrolu CCTV “Movel” neebe sira sei intrega CCTV sira iha Dili laran tomak. Kuandu iha situasaun ruma akontese sira bele lao dadauk no bele kontrola hela,” dehan nia ba jornalista sira iha nia knar fatin edifisiu MI, Tersa (09/12/2025).
Nia konsidera ho apoiu CCTV nee, ba oin PNTL mos sei halo ligasaun ho mobile telefone neebe mak deslignadu ona, hodi sira liga ba para depois kontrola hela, hodi hatene fatin ida nee mosu problema.
“Ida nee pasu pozitivu ida neebe mak diak tebes, bainhira ema baku malu sira bele ba hare hodi halo atuasaun. Entaun nee mak objetivu sira apoiu ekipamentu elektronik hirak nee bele tulun ita nia polisia sira halo servisu,” nia deklara.
Nia koalia, mobile CCTV nee hamutuk 2, ida sei instala iha sentru operasaun Komando PNTL, tanba makina nee iha rua. Entaun ida bele monta iha fatin neebe determinado no ida seluk sira lori lao tuir sira nia aan.
Nunee mos Komisariu Adjunto Krime Australia Federal Police (AFP) Ian McCartney, sublina, apoiu refere nuudar kooperasaun bilateral Australia ho Timor Leste, nunee oinsa bele reforsa servisu autoridade seguransa nian.
Jornalista: Jeniche da Costa
Editora: Domingas Gomes
