DILI, STLTIMORLESTE.com – Ministru Interior (MI), Francisco da Costa Guteres halao enkontru ho Komisariu Adjunto Krime Australia Federal Police (AFP), Ian McCartney, hodi deskuti kona-ba Australia nia apoiu ba Polisia Nasional Timor Leste (PNTL) no Polisia Sientika Investigasaun Kriminal (PSIK), hodi bele kombate krime rede organizador no jogu online ilegal.
“Ami deskuti hela kona-ba oinsa australia ninia apoiu ba iha krime organizadu sira ou krime transnasionais sira neebe agora servisu dadaun. Imi hatene ona katak, foin lalais ita konsege desmantela rede balu, mais ita tenki kontinua atensaun nafatin ba rede sira nee,” hatete Ministru nee ba jornalista sira, hafoin simu apoiu mobile CCTV iha edifisiu MI, Vila Verde, Tersa (09/12/2025).
Nia koalia, atu kombate krime organizadu sira liu-liu jogu online nee, diak ida ba orgaun polisia kriminal nee, tanba governu hasai tiha rezolusaun ida konaba taka tiha jogu online ilegal sira nee.
Nia esplika, rezolusaun governu hodi taka jogu online nee, promove husi Ministeriu Turismu no Ambiente hodi propoin ba Primeiru Ministru, depois aprova iha Konsellu Ministru iha fulan hirak liu ba iha tinan ida nee.
Nunee nia konsidera katak, rezolusaun governu nee kapas tebes hodi sai hanesan baze ba PNTL, liu-husi Diresaun Servisu Investigasaun Kriminal sira para hodi halo atuasaun para buka tuir autor sira neebe mak kria jogu oiline.
“Ita sei lao nafatin buka tuir autor ba jogu online sira, ita foin hetan balu, balu ita kontinua lao,ita kontinua vizilante no kontinua atentu para depois se deit mak iha intensaun aat atu hakarak viola regras neebe mak iha hakarak ka lakoi tenki hatan ba iha tribunal,” nia deklara.
Nia dehan, iha enkontru nee diskute hamutuk no hosi Australia promete sei ajuda TL atu eleva kapasidade investigador husi orgaun polisia kriminal ninian, oinsa atu detekta informasaun sira. Iha servisu informasaun no sira mos promete iha ekipamentu balu sira sei apoiu para ajuda detekta jogu online ilegal sira.
Iha fatin hanesan, Komisariu Adjunto Krime Australia Federal Police (AFP) Ian McCartney, hateten, vizita mai iha TL hasoru malu ho MI hodi apresia nivel kooperasaun kolaborasaun entre ajensia TL ho Australia, hodi hatudu kooperasaun bilateral kapas tebe-tebes.
“Vizita ida nee importante atu bele hetan konkordansia intendimentu diak ida, tanba regional evolusaun iha rejiaun nee hatudu katak, ita hotu-hotu hasoru desafiu ne’ebe mak makaas iha krime organizador ho buat sira seluk”, nia esplika.
Komisariu AFP nee akresenta, enkontru ho MI nee mos mantein kooperasaun neebe forte hodi bele hasoru desafiu sira, nunee Embaixada Australia iha TL kolabora diak ho Governu TL hodi apoiu makaas intermus politika, teknika nomos parte segura, nune’e buat hotu lao kapas tebes.
Nunee mos Embaixadora Australia iha TimorLeste, Caitlin Wilson fundamenta, vizita ida nee hatudu komitmentu kolaborasaun diak neebe maka Governu Austalia ho TL.
Jornalista: Jeniche da Costa
Editora: Domingas Gomes
