DILI, STLTIMORLESTE.com – Sekretaria Estadu ba igualdade (SEI) hamutukho parseiru halo enseramentu kampanha loron 16 ativizmu kontra violensia hasoru feto no labarik feto.
Iha Kuarta (10/12/2025), SEI halo enseramentu ba kampanha loron 16 ativizmu kontra feto no labarik feto ho tema hamutuk hasae konsiensia literasia dizital no online seguru ba feto no labarik feto iha diversidade hotu, ho atividade Marsa hahu husi Nicolau Lobato sentru Saude komoro nia oin too Tasi-Tolu.
Iha biban nee SEI konvida entidades hotu tantu publiku, privadu, sosiedade sivíl, joven feto no mane no komunidade hotu atu partisipa iha enseramentu loron 16 ativizmu kontra violensia hasoru feto no labarik-feto.
Ho espíritu koletiva atu promove sosiedade neebe seguru, inkluzivu no livre husi violensia, SEI hakarak konvida respeituozamente entidades publiku, setor privadu, organizasaun sosiedade sivíl, joven feto no mane, konviksaun relijiozo/a no komunidade em jeral atu partisipa iha enseramentu kampana loron 16 ativizmu kontra violensia hasoru feto no labarik-feto iha Timor Leste.
Kampanha ida nee reprezenta esforsu global no nasional atu afirma katak violensia hasoru feto no labarik feto la hetan toleransia iha sosiedade. Prezensa no kontribuisaun husi instituisaun sira sei hatudu lideransa, fortalese mensajen protesaun direitus umanus, no reforsa kompromisu komunal atu elimina violensia bazeia ba jeneru iha TL.
“Ita nia prezensa sei fo sinal klaru katak TL la tolera violensia hasoru feto no labarik feto, no ita fo sinal boot ba povu katak seguransa, dignidade no igualdade mak valor fundamental ba TL,” nia deklara.
Enseramentu ba kampana Loron 16 ativizmu kontra violensia hasoru feto no labarik-feto realiza iha Kuarta (10/11/2025) iha Rotunda Nicolau Lobato, marsa ba igualdade too Tasi Tolu, Suku Komoro, Postu Administrativu Dom Aleixo, Munisípiu Dili.
“Hamutuk ita kontinua hadia moris no futuru feto no labarik-feto neebe igual, dignu no livre husi violensia no tauk,” katak nia.
Tuir SEI, Elvina Sousa Carvalho katak, Violensia kontra feto hanesan violasaun kontra direitu ema-nian, tanba nee, indivídu, organizasaun, no entidades estadu nian iha obrigasaun atu hapara violensia kontra feto no labarik-feto.
Governu TiL adopta no implementa ona Lei Kontra Violensia Domestika (LKVD), durante tinan 15 neebe ninia natureza konsidera hanesan krime publika liuhusi lei nu. 7/2010, loron 7 de Julhu no atu haforsa lei refere Governu mos hamosu Planu Asaun Nasional Kontra Violensia Bazeia ba Jeneru (PAN-VBJ) neebe tama ba faze datoluk (2022-2032) liuhusi rezolusaun Governu Nu. 31/2022, loron 3 Novembru.
Sekretaria Estadu dehan, PAN-VBJ ida nee sei haforsa implementasaun Lei Kontra Violensia Domestika no asegura sustentabilidade no kontinuasaun parseíru hotu nian asaun hamutuk hodi kontra violensia hasoru feto no labarik-feto iha TL.
Atu sensibiliza komunidade sira kona-ba prevensaun violensia bazeia ba jeneru, violensia domestika, violensia seksual, asėdiu seksual no violensia seluk, nunee SEI hamutuk ho Grupu Mulheres Parlamentares Timor-Leste (GMPTL-PN), Komisaun F-PN, entidades Governu, Parseiru Sosiedade Sivil, Ajensia ONU no Parseiru Dezenvolvimentu implementador PAN-VBJ hamutuk ho komunidade sira sei realiza abertura kampana loron 16 ativizmu kontra violensia hasoru feto no labarik-feto neebe lidera direita husi Elvina Sousa Carvalho, Sekretaria Estadu ba Igualdade hamutuk ho membru Governu seluk, Prezidente GMPTL-PN, Prezidente Komisaun F-PN no Parseiru sira hotu.
Jornalista: Jacinta Sequeira
Editora: Domingas Gomes
