DILI, STLTIMORLESTE.com – Tribunal Judisial Primeira Instansia Dili (TJPID) halao primeiru julgamentu ba arguidu inisial MSJ hanesan laen, neebe lori mangera baku lezada inisial AFL hanesan feen nia matan too raan no bubu, tanba deit arguidu (Laen-red) deskonfia nia feen “selingkuh” ka amante ho mane seluk.
Tuir faktus katak, iha loron no fulan neebe mak lezada haluha, maibe tinan 2018, iha Kampung Alor, Dili, arguidu MSdJ lori ain tebe ho makas dala rua kona iha lezada AFL nia kabun mamar, tuku ho makas dala rua kona iha lezada nia matan laran sorin karuk ho loos, tuku dala rua iha lezada nia kanuruk, tebe dala ida iha lezada nia kidan.
Konsekuensia direta husi arguidu nia hahalok, lezada hetan moras makas iha kabun mamar, bubu no mean, dada iis araska, moras makas iha matan laran sorin karuk ho sorin loos, bubu no metan, moras iha kidan bubu no mean.
Lezada ba halo tratamentu iha HNGV, maibe la junta relatoriu mediku.
Kauza husi problema nee, tanba lezada kaer toman arguidu amante ho feto seluk, nunee lezada koalia ba arguidu mak hodi hamosu agresaun fizika nee.
Iha loron 24 fulan Maiu tinan 2022, haleu oras tuku 20:30, otl, iha Kampung Alor Dili, arguidu MSdJ lori kanuru suru modo nian baku ho makas kona iha lezada nia matan okos, baku iha lezada nia ain tur, kaer iha lezada nia fuuk hodi baku ba parede, tebe dala rua kona iha lezada nia kidan, tuku dala tolu kona iha lezada nia kabas, lori manggera baku dala barak kona iha lezada nia liman sorin loos ho sorin karuk, baku iha ain kabun sorin karuk no rasta lezada tama ba kuartu laran hodi save tiha odamatan.
Konsekuensia direta husi arguidu nia hahalok, lezada hetan moras makas iha lezada nia matan okos, sorin karuk, kanek risku, ran sai no bubu metan, kanek iha ain tur sorin loos, moras iha ulun fatuk, bubu no metan, moras iha kidan, moras iha kabas, bubu no metan, moras makas iha liman parte rua, moras iha ain kabun, bubu no risku mean. Lezada ba halo tratamentu iha Sentru Saude Komoro.
Kauza husi problema nee, tanba lezada ba festa, ho ida nee arguidu deskonfia lezada ho mane seluk neebe dansa ho lezada, tanba nee mak arguidu nervozu hodi halo agresaun fizika hasoru lezada.
Antes, iha fulan Marsu tinan 2012, arguidu pratika ona agresaun fizika hasoru lezada, rejistu ho NUK 0478/12.DICMR, neebe mak tribunal deside pena prizaun ho suspensaun ba arguidu.
Arguidu MSdJ halo ho forma livre deliberada no konsientemente, hatene katak, halo bebeik agresaun fizika hasoru lezada hanesan konsta iha akuzasaun, nuudar tratamentu fizika la-diak hasoru nia konjuje, tanba lezada hanesan arguidu nia ferik oan rasik, maski nunee arguidu pratika nafatin hodi konkretiza dunik ninia hakarak.
Tanba nee, Konstitui arguidu MSdJ nudar autor material ho forma konsumadu ba pratika krime maus tratus ba konjuje ho forma violensia domestika, previstu no punidu tuir artigu 1540 hosi Kodigu Penal konjuga ho artigu sira 2º, 3º alinea a) no artigu 350 aliea a) husi Lei Kontra Violensia Domestika n.º07/2010, loron 07 fulan Julhu.
Hatan ba akuzasaun neebe iha arguidu deklara katak, iha tinan 2018 arguidu la baku lezada, maibe kona-ba faktus seluk lalos ida.
Arguidu deklara, iha tinan 2022 no tinan 2024 arguidu baku duni lezada, tanba lezada ba amante ho ema seluk abandona labarik, ho ida nee maka arguidu baku lezada. No agora arguidu ho lezada hela separadu ona, no arguidu rekonhese haree lezada amante duni ho ema seluk.
Aleinde nee lezada mos deklara katak, iha tinan 2022 arguidu halo agresaun ba lezada tanba momentu neeba lezada ba iha festa, baku iha uma. Maibe antes nee arguidu la baku lezada ida. No lezada mos deklara, sira fahe malu.
Rona tiha arguidu no lezada, Tribunal husu atu tama ba iha faze alegasaun.
Iha alegasaun Prokurador, Napoliao da Silva deklara katak, arguidu konfesa ba faktus tanba nee Tribunal husu atu halo alterasaun Kualifikasaun Juridiku husi Krime Maustratos ba krime Violensia Domestika, husu Tribunal atu kondena arguidu ho pena multa.
Enkuantu Defeza husu Tribunal, tetu sirkunstansia hotu hodi aplika pena neebe justu ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Jose Escurial, Fransisca Cabral, Juiz estajiadu nain ida, Ministeriu Publiku reprezenta husi Prokurador, Napoliao da Silva, arguidu nain rua hetan asistensia legal husi Defensor Publiku, Manuel Exposto.
Jornalista: Terezinha De Deus
Editora: Carme Ximenes
