DILI, STLTIMORLESTE.com – Tribunal Judisial Primeira Instansia Dili (TJPID) kontinua adia desizaun ba kazu naok motor iha Manleuana neebe komete husi arguidu nain rua inisial VCB no CPS, tanba iha alterasaun ba provas foun balu.
Tribunal desidi adia desizaun, tanba iha alterasaun ba provas foun balu, ba iha deklarasaun entre arguidu ho sasin ho nunee, Tribunal halo alterasaun ba faktus foun.
Tribunal desidi ona halo alterasaun ba faktus foun, no desidi fila fali adia prosesu nee ba iha loron 17 fulan nee, maka foin tama ba iha faze desizaun.
Antes nee, iha alegasaun Ministeriu Publiku (MP) reprezenta Prokurador, Nelson Magno solisita ba Tribunal kolektivu atu aplika pena prizaun tinan lima (5) ba arguidu nain-rua, tanba MP intende katak provas sira neebe maka aprezenta iha akuzasaun no mos durante produsaun provas nee hatudu katak, arguidu VCB no CPS mak naok duni ofendidu no ofendida nia motor.
Prokurador konsidera katak, arguidu VCB hamutuk ho nia kolega naok Ofendida SdS nia motorizadas ho marka Honda Beat xapa matrikula W.8645 lakon iha merkadu Manleuana iha loron 24/12/2024 iha oras tuku 14h.
MP konsidera provadu duni katak, arguidu CPS mak foti ofendidu nia motorizadas Mio Beat xapa matrikula U.8043 lakon iha Laklubar-Manatuto iha loron 21/02/2024, ofenddiu nia motorizadas hetan fali ho kondisaun aat total, tanba lakon durante tinan 1 no hetan fali iha fulan Fevereiru tinan 2025 iha Polisia Eskuadra Bekora.
MP konsidera ho sirkuntasia agravantes arguidu sira la konfessa ba faktus, la arepende ba sira nia hahalok, seidauk rekonsilia ho ofendidu sira, no arguidu sira idade mesak sei joven.
Konsidera mos, arguidu VCB hamutuk ho nia kolega inisial Z ho hanoin ida ba iha merkadu Manleuana hodi foti ofendida nia motorizada, tanba nee mak motorizada refere hodi para iha VCB nia uma durante loron rua no hodi ba troka fali iha Hera ho motorizadas seluk.
Provadu duni katak, arguidu CPS mak foti ofendidu nia motorizada iha Laklubar Manatuto ho razaun ida katak, motorizada neebe mak sosa nunka atu sobu estraga kuandu sosa ho osan rasik mesmu kee segunda mão.
MP deduz akuzasaun hasoru arguidu VCB no CPS mai iha Tribunal Judisial Primeira Instansia Dili, tanba iha duni indisiu sufisiente katak arguidu sira hanesan autores material ba pratika krime ida Furtu agravadu ho forma konsumadu previstu no punidu tuir art. 252° n.º 1 aln.b) d) no 1) ho nia modura penal tinan 2 to tinan 8 iha prizaun.
No dadauk nee arguidu VCB kumpri Prizaun preventiva iha Bekora durante fulan 10 resin ona.
Tanba nee iha alegasaun MP solisita ba Tribunal koletivu atu aplika pena prizaun ba arguidu VCB no CPS ho pena prizaun tinan 5.
Maibe parte Defeza husu Tribunal kolektivu atu liberta arguidu VCB, tanba foin mak tinan 17 no dadauk nee arguidu sei eskola iha Ensinu Sekundariu Jeral klase 10 ano.
Audensia julgamentu nee, prezide husi Juiz Kolektovu Julmira auxiliadora, Argentino Nunes, Ivan Patrosenio no arguidu hetan asistensia legal advogadu privadu.
Jornalista: Terezinha De Deus
Editora: Carme Ximenes
