DILI, STLTIMORLESTE.com – Prezidente Republika (PR), Jose Ramos Horta promete sei hadia fasilidade Eskola Baziku Filial 1, 2, 3 no 9 Setembru Bobomana Tumin, Oesilu, Oecusse no hadia mos asrama ba estudante neebe hela dook.
Liafuan nee Prezidente Republika Jose Ramos Horta hatoo ba jornalista sira iha Palasiu Prezidensial Nicolau Lobato, Bairo Pite, Kinta (11/12/2025).
Nia hatete, ohin estudante husi Eskola Baziku Filial 1,2,3, 9 Setembru Bobomana Tumin Oesilu, Oecusse hamutuk ho profesores sira mai relata preokupasaun neebe sira hasoru ba Prezidente.
“Komprimisiu hau nian mak ami sei hadia eskola nee iha neeba, hadia kedas fo ona orientasaun ba staf ba iha neeba, saida mak presiza no material sira nee sosa kedas. Iha kontrator ruma bele halo selae lojistika prezidensia nia mak halo sira iha esperensia diak halo ona uma barak ba komunidade ho kualidade portantu bele halo mos eskola nee tenke halo kedas prioridade ida, depois haree tok iha ona asrama ida iha neeba Prezidensia mos bele hadia asrama nee tau sala kaza de banho,” dehan PR Horta.
Prezidente Republika hatete, estudante balun neebe mak mai hasoru Prezidente balun hela dook mak mai eskola, tanba nee balun hakarak hela iha Dili i Prezidente sei buka apoiu sira neebe hakarak atu eskola fali iha Dili.
“Hau koalia ho madre balun simu sira hela iha asrama Dili, hau rasik pesoalmente bele selu sira nia fulan no sira neebe hakarak hela bele hela, no sira neebe dook husi familia, Prezidensia Republika no hau bele selu transporte komforme,” dehan nia.
Nia hatete, ida nee problema iha Timor laran tomak laos Oecusse deit, no Prezidensia Republika apoiu ona asrama lubuk ida Padre, no madre iha Timor laran. No Prezidensia halo mos uma lubuk ida ba povu kiik sira iha Munisipiu sira.
Nunee mos Profesor Renato Unamet de Jesus hatete, ohin estudante nain 11 hamutuk ho professor nain 4 mai hasoru malu ho Prezidente Republika Jose Ramos Horta, tanba hetan konvite husi Prezidente.
“Ami husi EBF Eskola Baziku Filial 1,2,3, 9 Setembru Bobomana Tumin Oesilu, Oecusse mai hasoru Prezidente, tanba hetan konvite husi Prezidente Republika. Ohin ami mai hola parte iha nee atu halo enkontru ofisial ida neebe mak ami halo ho Nai Prezidente Republika. Sentimentu neebe ami iha mak ami kontente tebes, ida nee iha ami nia moris lahaluha ba ami nia oan no estudante nain 11 ho professor nain 4 ami sei lahaluha iha ami nia moris,” dehan Profesor nee.
Nia hatete, ida nee pela premeiru vez mai hasoru Prezidente Republika, maske eskola iha area rural, maibe lakohi lakon ho eskola sira iha iha vila.
Dala ida tan agradese ba Prezidente Republika Jose Ramos Horta ba oportunidade osan mean ida nee, sira sei lahaluha iha sira nia moris.
Nia hatete, objetivu hasoru malu Prezidente Republika mak hodi hatoo sentimentu neebe estudante sira sente iha area rural neeba relasiona ona ho fasilidade neebe la komportavel nomos problema baziku balun neebe esudante sira hasoru, tanba nee koalia ho Prezidente hodi koko hamutuk konaba dezafiu neebe iha.
“Infraestrutura baziku sira neebe ami iha hanesan ita hatene estudante barak hela dook, ita prepara fatin ruma ezemplu asrama ruma neebe besik nunee bele hatama labarik sira, tanba iha estudante balun lao kilomentru 6 neebe sae foho hodi mai eskola. Nee mak objetivu ohin mai atu hatoo ba Nai Prezidente hodi rona rasik, nunee iha futuru bele harii netik alin sira nee,” dehan nia.
Nia hatutan, estudante iha eskola refere total 500, ida nee konta hamutuk ho premeiru siklu segundu siklu no terseiru siklu.
Jornalista: Emerenciana Pinto
Editora: Domingas Gomes
