DILI, STLTIMORLESTE.com – Korea intersadu tebes atu simu Timor oan servisu iha Korea do Sul, no daudaun nee Timor oan rihun 7 mak servisu ona iha neeba.
Prezidente Republika, Jose Ramos Horta hatete, Corea iha intrese boot atu simu Timor oan servisu iha Korea do Sul.
“Korea sira interesadu loos atu aumenta ajuda no aumenta kolaborasaun. Hau mak uluk nuudar Ministru Negosiu Estranjeiru no Kooperasaun lobi iha Korea, nunee loke odamatan ba Timoroan sira ba servisu iha neeba. Bainhira hau hahu neeba nee koalia ho sira, sira hanesan loke ibun, tanba nunka rona traballador Timor, trabalhador Timor agora iha rihun 7 iha Korea du Sul,” dehan Horta ba jornalista bainhira remata halo enkontru ho estudante sira husi Oecusse iha Palasiu Prezidensial Nicolau Lobato, Bairo Pite, Kinta (11/12/2025).
Xefe Estadu hatete, Timor Leste iha relasaun neebe diak tebes ho Korea do Sul no agora ho embaixador foun hakarak aumenta tan numeru Timor oan atu halo serbisu iha neeba.
“Hau uluk kedas relasaun metin ho Korea do Sul, hau koalia ho sira diak, sira haree Embaixador foun atu mai, sira sei haree atu aumenta tan ajuda, sira hakarak traballador Timoroan ba tan aumenta, tanba sira araksa ho traballador,” dehan PR Horta.
Nia afirma, iha Korea populasaun joven ladun, katuas mak barak, Timor joven barak servisu laiha entaun ba Korea manan osan diak. Laos deit manan deit osan, aprende, depois sira fila mai Timor ho osan, esperiensia nee hanesan estratejia. Australia mos simu lubuk ida, aumenta tan, la kleur osan tama nee lubuk ida. Maibe osan tama mai husi trabalhador sira diak, tanba nee ba direitamente família, la liu husi governu ka ONG ruma.
Jornalista: Emerenciana Pinto
Editora: Domingas Gomes
