KELIKAI, STLTIMORLESTE.com – Iha loron 11 Dezembru 2025 parte meudia, ofisialmente komunidade Suku Uaitame, Munisipiu Baukau, taka ona odamatan Sede Suku ba funsionariu suku no Konselhu Suku sira.
Hafoin remata konferensia imprensa hodi kontra rezultadu votasaun husi Konselhu Konsultivu Munisipal (KKM) Baukau diside destinu Suku Uaitame hamutuk ho Postu Administrativu Kelikai Antigu, Munisipiu Baukau, komunidade Celestino Moreira hateten, razaun komunidade Suku Uaitame foti inisiativa taka odamatan Sede Suku, laos durante tinan ida Administrasaun Suku la lao, maibe taka odamatan Sede Suku, tanba komunidade la aseita atu ba Postu Kelikai Antigu.
“Ami foti inisiativa taka sede Suku, tanba komunikadu imprensa ami halo la aseita total ba Kelikai Antigu ho razaun ida nee mak ami taka sede Suku,” Celestino hateten ba jornalista sira, iha Suku Uaitame, Kinta (11/12/2025).
Nia rekonhese, taka odamatan sede Suku ba funsionariu suku nain 4 no Konselhu Suku fo impaktu ba atendimentu komunidade nian iha Suku, maibe taka odamatan sede Suku desizaun kolektivu husi komunidade no brani foti risku, tanba hakarak mantein iha Postu Kelikai.
Maibe asaun taka odamatan sede Suku fo sinal ba Autoridade Munisipiu, atu solusiona preokupasaun komunidade Suku Uaitame nian.
“Ami nia ezijensia mak nee Autoridade Munisipiu Baukau, tenke toma responsabilidade tun lalais rezolve ami nia problema ida nee,” Celestino komenta .
Iha fatin hanesan funsionariu Suku Uaitame, Evaresto Moreira preokupa ho asaun komunidade sira taka odamatan sede Suku, tanba funsionariu Suku neebe Governu liu husi Ministeriu Administrasaun Estatal rekruta hodi destaka iha Suku Uaitame, fatin servisu mak Sede Suku, maibe komunidade sira foti inisiativa taka odamatan sei fo prejudika ba servisu Administrasaun Suku nian.
“Rekruta ami husi Governu ami nia servisu fatin mak sede Suku Uaitame ami la ba fatin ida ami nain 4 nee servisu iha nee laos servisu iha Postu, ami halo tuir deit ona tanba sistema demokrasia, ami servisu ba povu ponte ida ba Governu, maibe sira taka ona odamatan ami mos la servisu ona,” Evaresto hateten .
Nia argumentu, mezmu komunidade sira taka ona odamatan sede Suku, maibe hanesan funsionariu Suku neebe rekruta husi Governu sei mantein prezensa iha sede suku mezmu la halo servisu Administrasaun nian, maibe tuur iha liur nunee bainhira bainaka ruma husi Nasional no Munisipal prezensa iha Sede Suku Uaitame bele atende no konta problema neebe Suku Uaitame infrenta.
Tanba nee husu Autoridade Munisipiu Baukau atensaun no solusiona lalais probelma neebe Suku Uaitame infranta. nunee servisu Administrasaun Suku Uaitame nian lao hikas fali hanesan baibain.
Too notisia nee publika, STL seidauk hetan konfirmasaun husi Prezidente Autoridade Munisipiu Baukau.
Entretantu tuir observasaun jornalista STL nian iha terenu nota katak, asaun taka odamatan sede Suku Uaitame envolve husi jovem, idozu, idoza no seluk tan.
Jornalista: Tomas Reis
Editora: Carme Ximenes
