KELIKAI, STLTIMORLESTE.com – Joven sira iha Suku Uaitame, Munisipiu Baukau sente triste, tanba laiha karimbu hodi marka iha sira nia dokumentu hodi asesu ba vaga sira iha rai liur no rai laran.
Reprezentante Joven Uaitame, Juvêncio Moreira hateten, jovem sira iha territoriu nasional Timor Leste, iha direitu atu asesu ba vaga sira neebe anunsiu iha publiku, maibe uniku joven sira iha Suku Uaitame durante tinan 2025 labele asesu vaga sira neebe anunsiu iha publiku, tanba difikulta trata dokumentus iha Suku.
“Ami la mentavel sente triste tanba durante tinan ida oportunidade ba servisu ami Uaitame oan ami laiha oportunidade, tanba laiha karimbu ami hanesan fali ilegal iha rai Timor,” Juvêncio hateten ba jornalista sira, iha Uaitame, Kinta (11/12/2025).
Nia katak, razaun la hetan marka husi karimbu Suku nian iha dokumentus, tanba Xefe Suku rasik tinan ida ona la marka prezensa iha sede Suku hodi halao servisu Suku nian liu liu atende joven sira nia dokumentu hodi aplika ba vaga sira neebe anunsiu iha publiku.
Venâncio konsidera, vaga husi Polisia Nasional Timor Leste neebe anunsiu iha publiku fo oportunidade diak tebes ba jovem sira atu kompete, maibe obrigadu joven sira husi Suku Uaitame, tanba kauza husi la hetan markasaun karimbu iha dekalarasaun Suku.
“Ami joven husu rezolve lalais problema iha Suku Uaitame, nunee ami bele hetan oportunidade ba vaga sira,” Nia sujere.
Komunidade Uaitame, Amaro Freitas hateten, hanesan Aman sente triste, tanba durante tinan ida jovem sira iha Suku Uaitame lakon oportunidade ba vaga sira neebe iha.
“Tinan ida ona ami Suku Uaitame terus, tanba ami nia Xefe Suku halai ba Postu Kelikai Antigu Povu halai ketak, problema mak iha ami nia karimbu nee, komunidade sira lao labele tanba vaga ruma mai labele asesu tanba karimbu laiha,” Amaro katak .
Nia sublina, aleinde difikulta joven sira trata dokumentu atu aplika ba vaga sira, difikulta mos jovem no labarik estudante sira neebe prezisa deklarasaun Suku nian, tanba laiha karimbu atu marka.
Nia komenta, Suku Uaitame antes nee iha karimbu, maibe hafoin rona Suku Uaitame pertense ba Postu Kelikai Antigu, Xefe Suku entrega tiha karimbu tuan ba Munisipiu no simu karimbu foun pertense ba Postu Kelikai Antigu nian, maibe komunidade la hatene asuntu refere too Xefe Suku la marka prezensa iha Suku.
Liga asuntu nee, STL tenta konfirma Xefe Suku Uaitame Celestino F. Moreira liu husi via telefone, maibe la bele fo komentariu ba asuntu refere, tanba kondisaun moras no daudaun iha hela faze tratamentu.
Jornalista: Tomas Reis
Editora: Carme Ximenes
