DILI, STLTIMORLESTE.com – Ohin Ministra Finansas (MF), Santina Cadoso asina akordu kooperasaun ho Ajensia Kooperasaun Japaun (JICA), por volta US$ 3 milhões, hodi apoiu ba Institutu Jestaun Ekipamentus, liu-liu ba ekipamentu pezadu sira.
“Hau hanoin apoiu neebe Japaun fo US$ 3 milhões bele fo benefisiu diak liu tan, atu nunee sira bele halao sira nian knaar no funsaun iha servisu loron-loron nian, akordu ohin asina maibe iha ekipamentu neebe sira sei hola, neebe fo ba sira, neebe ekipamentu nee tinan ida ka rua, maibe sira mos nafatin fo apoiu tekniku reforsa sira nia funsaun sira,” dehan Santina ba jornalista sira iha Salaun MF Aitarak Laran, Kinta (11/12/2025).
Santina esplika, situasaun neebe emerjensia sira nia prezensa sempre fo apoiu ba situasaun neebe presiza duni, laos ba ida nee deit, maibe sira ajuda barak iha konstrusaun neebe governu nia iha rasik.
“Ita hatene katak Institutu Jestaun Ekipamentu husi kedas primeiru sempre hetan apoiu husi enjeñaria Japaun nian no mos ate agora transforma aan ona ba institutu publiku jestaun ekipamentu, hau hanoin iha situasaun neebe mudansa klimatika, sira nia prezensa liu husi brigada sira neebe iha, sira presiza tebes ekipamentu pezadu sira bele halo normaliza ba situasaun ruma bainhira iha inundasaun,” dehan nia.
Iha fatin hanesan, Daisuke Fukumori-Chief representative of JICA Timor Leste (TL) dehan, tuir adezaun ofisial (TL) nian ba ASEAN, infraestrutura robusta, sei sai xave hodi loke oportunidade ekonomika no hametin integrasaun rejional no iha konfiansa katak inisiativa ida nee sei kontribui ba kresimentu inkluzivu no hasae TL nia papel iha rejiaun nee.
Nia dehan, TL hasoru dezafiu uniku hodi harii infraestrutura neebe reziliente ho dezastre natural sira neebe akontese beibeik hanesan udan boot, bee sae no rai halai, ho proporsaun boot husi estrada sira neebe seidauk taka, hametin rede estrada sira laos deit kestaun konveniensia nian, ida nee kestaun reziliensia no seguransa nasional nian.
“Fornesimentu ekipamentu esensial sira, inklui estabilizador rodoviariu sira sei permite TL atu konstrui no halo manutensaun ba estrada sira neebe dura, hodi garante konetividade neebe konfiavel ba komunidade, fo resposta neebe lalais durante emerjensia, foin lalais nee ba ekipamentu pezadu unidade 26, programa ohin nian harii iha fundasaun ida nee no reflete ami nia vizaun fahe ba dezenvolvimentu sustentavel,” nia dehan.
Entretantu Ministru Interino Obras Publika, Julio do Carmo hatoo agradese ba Governu Japaun liu husi Ajensia JICA neebe tulun ona povu Timor Leste (TL) liu husi ekipamentus sira.
“Obrigadu barak ba Governu Japaun liu husi Ajensia JICA neebe apoiu povu TL liu husi ekipamentus sira alat berat, ho osan milhaun US$ 3 sosa ekipamentus sira liu-liu hadia ami nia dalan halo reabilitasaun kontrusaun ba estrada sira neebe mak ami presiza halo iha rai nee,” afirma Júlio.
Governante nee mos husu nafatin ba Governu Japaun liu husi Ajensia JICA iha futuru nafatin ajuda povu Timor Leste no Japaun laos foin mak ajuda Timor Leste, maibe desde inisiu Timor ukun aan ajuda ona buat barak hodi apoiu Timor Leste nia dezenvolvimentu iha rai ida nee,” Júlio hakotu.
Jornalista: EST
Editor: Xisto Mendonça
