DILI, STLTIMORLESTE.com – Prezidente Republika (PR) Jose Ramos Horta entrega premiu ba manan-nain sira ba Konkursu Harii Pas liu husi Arte Publiku, destaka unidade nasional liu husi arte no Timor-Leste nia adezaun istoriku ba ASEAN.
Eventu nee halao iha Palasiu Prezidensial Nicolau Lobato, Sesta (12/12/2025), destaka kbiit transformativu arte nian hodi haburas unidade nasional no armonia rejional, alina ho adezaun istoriku Timor-Leste nian ba Asosiasaun Nasaun Sudeste Aziatiku (ASEAN).
Konkursu nasional, inisiativa husi Prezidensia Republika liu husi Arte & Kultura no Apoiu ba Edukasaun, ho apoiu tekniku hosi Sekretaria Estadu Arte no Kultura (SEAK), envolve artista sira hosi munisípiu hotu-hotu.
Partisipante sira hetan knaar atu kria arte publika neebe sai hanesan veíkulu ba espresaun koletiva no símbolu identidade kultural, nunee hametin koezaun sosial no sidadania ativu iha alinamentu ho valor sira ASEAN nian.
Serimonia nee kulmina prosesu ida neebe dura besik fulan rua, hodi rekonhese exelensia artístika no papel vital arte publika nian hanesan katalizador ba transformasaun sosial.
Manan nain ba konkursu “Harii Pas liu husi Arte Publika” mak hanesan tuir mai nee 1º Lugar ($1.500) Munisípiu Díli, Artista sira Nelio Eusebio de Fatima Baptista, Nomerio F. S. Santos Correia, Raimundo Faustino no Avelino Lourenço Pires) 2º Lugar ($1.000): Munisípiu Liquiça, Artista sira Romualdo dos Santos da Silva, Higino Martins da Silva no David Sousa Ramalho) 3º Lugar ($800): Munisípiu Manufahi, Artista sira Riqui Ricardo L. de Jesus, Luís Gonzaga da Silva Fernandes, Rovaldo Francisco de Jesus Ximenes no Angelino da Costa M. Pereira). 4º Lugar ($600): Munisípiu Lautem, Artista sira: Alfionito de Mardino Freitas, Zelindo Fernandes, Cesar Augusto Soares Lourdes, Renato Paunu Z. de Oliveira Isaac no Izaias A. Ego Titi Lopes.
Hodi rekonhese artista sira-nia kreatividade no kompromisu, Prezidente Ramos Horta hateten obra arte forte sira laos deit dekorasaun maibe sira mak testamunha vibrante.
”Obra arte publika forte sira nee laos deit dekorasaun, sira mak testamunha vibrante ba ita-nia espíritu nasional no ita-nia atinji ba pas neebe dura. Bainhira ita lao ba faze ASEAN nian, sira espresa vizualmente ita-nia valor komun iha unidade no reziliensia kreativa, hodi harii ponte sira komprensaun nian neebe hahu iha ita-nia komunidade sira no habelar iha rejiaun tomak,” dehan PR Horta.
Eventu nee hatudu mos projesaun dokumentariu Harii Pas liu husi Arte Publika no espozisaun fotografia neebe produz hosi Prezidensia Republika liu hosi Servisu Komunikasaun Sosial, neebe hatudu obra arte sira.
Inisiativa ida-nee reforsa Timor-Leste nia imajen nuudar nasaun kreativu, komprometidu klean ho valor fundamental ASEAN nian no aproveita kultura nuudar pilar ba identidade nasional no harii pas.
Jornalista: Emerenciana Pinto | Editora: Carme Ximenes
