DILI, STLTIMORLESTE.com – Ministeriu Publiku (MP) iha alegasaun final ba krime sukestru no abuzu poder solisita ba Tribunal kolektivu atu kondena arguidu nain tolu (3) ho inisial JXB, MdC, no DNS hanesan membru F-FDTL tuir provas neebe iha.
Iha alegasaun nee, Prokurador Aderito Tilman deklara katak, arguidu sira rona informasaun katak, lezadu lori lider sira nia naran halo kombransa ilegal ba komunidade sira iha Manatuto.
Prokurador deklara, iha audiensia julgamentu laran, sasin sira deklara arguidu sira halo agresaun fisika hasoru lezadu sasin la haree, maibe fotografia hatudu katak, lezadu hetan agresaun fiziku hosi arguidu sira, tanba nee husu ba Tribunal atu kondena arguidu sira tuir provas neebe iha.
Enkuantu husi parte defeza, Sergio Dias Quintas, solisita ba Tribunal Koletivu atu absolve arguidu nain tolu, tanba defeza haree katak, provas laiha atu kondena arguidu sira. Rona tiha alegasaun, Tribunal adia ba loron seluk hodi rona desizaun.
Tuir faktus sufisiente katak, iha loron 28 Janeiru 2022, tuku 8:30 kalan, arguidu JXB, kontaktu ba lezadu AS liu husi telemovel no konvida lezadu atu ba hemu kafe iha jardim Motael Dili, ho intensaun atu koalia kona ba projetu eletrisidade.
Hafoin kontaktu lezadu ho nia kolega DP ba iha fatin neebe determina husi arguidu JXB, bainhira too iha fatin refere, parte lezadu hasoru malu ho arguidu no sira koalia konaba asuntu neebe temi ona.
Lezadu haree arguidu haruka mensajen, maibe lezadu lahatene arguidu haruka mensajen ba se. Hafoin lezadu koalia hela ho arguidu JXB, ema neebe arguidu haruka mensajen ba nee lakleur deit sira mos mai, sira nee maka hanesan arguidu JXB, hamutuk ho arguidu MdC no DNS no ema sira neebe nia la kongese, no diretamente halo agresaun ba lezadu, tuku iha ibun, hirus matan no kuaze isin tomak.
Hafoin halo ataka fiziku ba lezadu, sira kontinua lori lezadu ba Kuartel Jeral PNTL iha Kaikoli Dili. Bainhira too iha sala investigasaun iha Kuartel Jeral PNTL Kaikoli Dili, arguidu DNS obriga lezadu asina dokumentu neebe sira prepara tiha ona, maibe lezadu lakohi asina. Nunee arguidu DNS tuku iha lezadu nia hasan sorin loos no kontinua tuku lezadu iha kakorok too monu ba rai no halo moras no kanek.
Sira obriga lezadu atu asina dokumentu nee, maibe lezadu lakohi no arguidu DNS kaer lezadu nia liman no asina dokumentu nee.
Arguidu sira laiha autoridade atu detein ema seluk, maibe arguidu sira JXB, MdC no DNS, uza sira nia autoridade nudar membru F-FDTL hodi halo asaltu fiziku ba parte neebe hetan kanek, hodi obriga sira tenke asina dokumentu neebe sira prepara tiha ona.
Arguidu sira tula lezadu ho karreta neebe laiha numeru xapa matrikula ba Kuartel Jeral PNTL, iha neebe sira asalta ho fiu eletrisidade metan iha nia isin lolon tomak.
Arguidu sira, bainhira halao aktu sira neebe deskreve, sira hatene katak lei bandu, sira atua ho livre, deliberada no konsiente, no la hadook aan hosi hahalok hanesan nee. Sira hakarak atu estraga parte neebe hetan kanek iha nia integridade fiziku, hodi hamosu moras no kanek sira, neebe maka akontese duni.
Arguidu sira tau lezadu iha sala investigasaun iha Kuartel Jeral PNTL, la konsege sai hosi fatin, asalta nia ba objetivu ida nee, nunee hasai nia liberdade, neebe sira hotu hakarak halo ho livre no ho konxiensia.
Depois, maizumenus iha tuku 11:00 pm, arguidu sira tula fali lezadu neebe ho kondisaun grave ona, iha karreta ida no husik hela iha area Palapaso, Dili.
Arguidu sira hatene didiak katak sira-nia hahalok hetan bandu no punivel hosi lei nuudar krime, no enune viola dever sira neebe iha sira nia estatutu nudar membru F-FDTL no funsionariu publiku sira, liu-liu dever imparsialidade, laran manas, lealdade no integridade, hodi tau iha risku interese Estadu nian no legalidade asaun husi ninia orgaun hotu hotu no ninia ajente sira-nia onestidade, nudar indispensavel ba kondisaun sira ezersisiu ba sira nia funsaun publika.
Tanba nee Ministeriu Publiku akuza arguidu nain tolu komete krime sukestru no abuzu poder neebe previstu iha artigu 160 no artigu 297.
Audiensia julgamentu nee prezide husi Juiz Kolektivu Ana Paula, Ersilia de Jesus, Jose Maria, Ministeriu Publiku reprezenta husi Prokurador Aderito Tilman, no arguidu sira hetan asistensia legal husi Defensor Publiku Sergio Dias Quintas.
Jornalista: Terezinha de Deus | Editora: Domingas Gomes
