BAUKAU, STLTIMORLESTE.com – Eleitores 34% iha Munisipiu Baukau hetan ona kartaun eleitoral biometriku no Sekretariadu Tekniku Administrasaun Eleitoral (STAE) planu sei destaka ekipa STAE iha nivel Postu, hodi fo atendimentu diak liu tan ba eleitores sira.
Diretor STAE Munisipiu Baukau, Natividade Freitas Guterres esplika, atendimentu ba eleitores sira neebe atualiza kartaun eleitoral semi biometriku ba biometriku husi inisiu fulan Outubru 2024 too inisiu fulan Dezembru 2025, atinji ona hamutuk rihun 33.555 no rejistu foun hamutuk 3.161 ho totalidade eleitores iha Munisipiu Baukau neebe iha ona kartaun eleitoral biometriku hamutuk 34.52%.
“Total neebe ita atualiza 34.52%. tanba ita nia ekipamentu la too ita halo mekanizmu halo atendimentu movel tun ba kada Postu faze dala rua, preokupasaun ida mak dala ruma linha internet mak la diak no problema seluk mak eletrisidade sempre mate,” Natividade hateten ba jornalista sira, iha knaar fatin Vila Nova, Baukau, Segunda (15/12/2025).
Nia sublina, husi total eleitores neebe atualiza ba biometriku esforsu mos husi ekipa STAE neebe implementa atendimentu movel iha kada Postu, maibe atendimentu iha nivel Postu infrenta problema, tanba impaktu mos husi menus ekipamentu hanesan makina fargon neebe daudaun STAE Munisipiu Baukau iha deit unidade 2, inklui kauza seluk mak linha internet lentu no enerjia eletrisidade la estavel.
Maibe atu hadia liu tan STAE nia atendimentu iha nivel Postu, mak STAE ajusta planu no hetan ona aprovasaun, tanba nee iha tinan 2026 sei estabese ekipa permanente iha nivel Postu Administrativu, hodi fo atendimentu besik no diak liu tan ba eleitores sira liu liu Ema ho Difisiensia no idozus sira iha baze.
“Ami nia orsamentu mos aprova ona iha 2026 nee ami sei destaka kada Postu nee iha ona, neebe ita nia ekspektativa Baukau laran ita bele kobre hotu iha fulan 6 nia laran,” Natividade katak.
Enkuantu eleitores Luciano Cipriano apresia ho politika STAE nian neebe hakarak lori besik atendimentu trata kartaun eleitoral biometriku ba eleitores sira iha baze, nee diak, tanba durante fo atendimentu iha deit nivel Munisipiu fo impaktu ba eleitores sira neebe ho viajen dook.
“Se hanesan nee diak, tanba iha nee atendimentu diak ona maibe kona-ba atu distribui fila fali ba eleitores sira nee mak fraku, tanba atu simu fali deit kartaun nee balu tenke hein too semana no aat liu tan mak ami husi Venilale seidauk simu too agora,” Luciano informa.
Eleitores Venilale oan nee katak, nia parte trata kartaun eleitoral husi semi biometriku ba biometriku kuaze fulan 4 ona, maibe nia parte seidauk simu kartaun eleitoral biometriku original husi STAE Baukau.
Nia komenta, atendimentu refere presiza muda, tanba fo impaktu ba eleitores sira neebe halo viajem dook.
“Difikulta tebes ami, tanba primeiru transporte segundu ami lakon tempu, tanba tempu agora ami agrikultor nia tempu atu ba hamoos natar, maibe soe tempu mai deit ida nee, tanba nee hau rekomenda ba Governu liu liu Ministeriu Estatal hadia sistema atendimentu publiku sira nee,” Luciano katak.
Entretantu tuir observasaun jornalista STL nian iha resintu Edifisiu STAE Munisipiu Baukau segunda feira nee nota katak, eleitores sira entusias tebes forma hodi trata kartaun eleitoral biometriku.
Jornalista: Tomas Reis
Editora: Carme Ximenes
