DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MDGRM, tanba sosa tutan kilat anin.
Tuir akuzasaun katak, iha inisiu arguidu MDGRM hetan informasaun liu husi Facebook ho ID naran Lao Rai mak faan objetu (kilat anin), entaun arguidu telefone diretamente ba individu nee maibe arguidu la hatene nia naran.
Hafoin telefone ba malu, individu ho ID. Lao Rai nee lori objetu kilat anin sira nee ba iha dalan Audian nian, depois arguidu lori ba iha nia uma iha Santa Cruz no hola tiha kedas kilat anin sira nee, maibe arguidu la husu tuir kilat nee mai husi neebe.
Data mak arguidu la lembra, maibe hola kilat anin nee iha fulan Novembru tinan 2021, haleu oras tuku 22h kalan OTL mak arguidu sira sosa objetu sira nee.
Katak iha tempu neeba iha ema mane nain rua mak tau kilat anin nee iha doz ida nia laran, depois tula iha motor leten mak lori ba iha dalan Audian iha oras tuku 22 kalan, entaun arguidu mos ba hasoru depois arguidu MDGRM hola kedas.
Arguidu sira halo transkasaun faan no sosa objetu (kilat) sira nee iha tempu kalan, tanba tauk ema atu kaer sira.
Kilat anin sira neebe arguidu sosa no pose iha altura neeba mak hanesan, Kilat anin teleskop ida (1), kor metan-azul, marka Predator Airguns 177 cal/4,5mm. Kilat anin teleskop ida (1) kor matak, marka Ataman. Kilat anin teleskop kor metan ida (1) marka Bramsta “mini sport”. Kilat anin kor metan ida (1) marka sharp tiger numeru A4234348.
Arguidu sira halo hahalok nee ho forma konsente, livre, deliberada, arguidu sira hatene katak, liu husi facebook deit, la konese ema neebe faan objetu, la husu tuir sasan nia orijen, maibe arguidu sira hakarak sosa para hodi uza, nee konsidera hanesan meiu ida para hodi rai no uza sasan neebe la hatene nia orijen, sasan nee iha proveniensia lejitima ka lae, maibe arguidu sira hakarak pratika aktu ida nee.
Katak arguidu sira nia hahalok nee lei bandu, maibe arguidu sira hakarak pratika nafatin.
Tanba nee, konstitui arguidu ESG no MDGRM nuudar ko-autor material ho forma konsumadu, pratika krime ida (1) Reseptasaun previstu no punidu tuir art. 271º n.1 husi kodigu penal.
Hatan ba akuzasaun neebe iha arguidu deklara katak, hili direitu silensiu, tanba konsidera faktus neebe konsta iha akuzasaun loos hotu.
Sasin Jose Malik deklara katak, sasin konhese arguidu hanesan sasin nia oan mane. Sasin deklara momentu neeba ema neebe lori ba fan iha kalan, kona-ba kilat sira nee mai husi neebe sasin la iha konesementu.
Rona tiha sasin, Tribunal husu atu tama ba iha faze alegasaun.
Iha alegasaun Prokurador Pedro Baptista deklara katak, iha audensia arguidu hili direitu silensiu, tanba konsidera faktus loos hotu.
Prokurador mos deklara, sasin haree duni iha armas, maibe armas sira nee lori mai husi neebe sasin la hatene.
Ministeriu Publiku (MP) haree katak, la konsege apura lolos orijem husi armas sira nee mai husi neebe. No klaru armas sira nee mai husi rai liur, no deskonfia bele mai husi arma kontra bandu, maibe iha julgamentu la deskobre lolos konaba armas sira nee mai husi neebe.
MP konsidera, la iha provas sufisiente atu kondena arguidu, tanba nee MP husu atu absolve arguidu.
Aleinde nee, Defeza Humberto Alves, apresia alegasaun MP nian, tanba krime nia orijem ba aktu ilisitu nee se loos, tanba arguidu sosa tutan deit.
Tanba nee Defeza husu, atu absolve arguidu husi instansia.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezinde husi Juiz, Jose Maria, Ministeriu Publiku, Pedro Baptista, arguidu hetan asistensia legal husi Defensor Publiku, Humberto Alves.
Jornalista: Terezinha De Deus
Editora: Carme Ximenes
