DILI, STLTIMORLESTE.com – Prezidente Tribunal Rekursu (PTR), Afonso Carmona hatete, planu Tribunal nian iha tinan 2026 sei realiza julgamentu Tribunal movel, maibe ho forma modifikatif.
“Tinan oin mai laos Tribunal movel deit, ita hanoin fali Tribunal movel modifikatif oinsa ita halo julgamentu iha foho, oinsa ita esplika divulgasaun lei ba sira, “dehan PTR, Afonso Carmona ba jornalista sira, iha Kaikoli, Dili, Segunda (15/12/20250.
Tuir nia, Tribunal movel tinan oin laos iha deit, Likisa Ermera no Aileu, iha Dili mos bele iha tuir bairru sira, hodi hanaran Tribunal movel modifikatif, julgamentu iha fatin.
“Tribunal movel lao nafatin ita la taka, agora Juiz nia planu atu ba Tribunal movel kontinua aprova, tanba sira ba hodi rejolve problema. Tanba nee Tribunal movel hanesan meius ida atu redus kazu pendente sira,” dehan nia.
Iha fatin ketak, Jurista Jose Maria Guterres konsidera, julgamentu movel importante kontinua halao ba oin.
“Julgamentu movel importante kontinua lao ba oin, atu apoiu redus kazu pendente neebe iha, tanva agora iha Tribunal sira kazu pendente kontinua iha,” dehan nia.
Nia dehan, prosesu balu kontinua pendente dala ruma mos, tanba deit arguidu ka lezadu sira hela ho distansia dook husi kapital, se iha tribunal movel prosesu sira nee bele lori ba julga iha Munisipiu atu parte sira fasil atu asesu.
Jornalista: Terezinha De Deus
Editora: Carme Ximenes
