DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial DMS, tanba komete krime hasoru lezada VMFB.
Ofendida VMFB moris hamutuk hanesan feen ho laen ho arguidu DMS iha tinan 2019, iha oan nain 2 no ekonomikamente dependensia ba arguidu.
Iha loron 20 fulan Fevereiru tinan 2024, haleu oras tuku 13:00, OTL, iha Bekora, Dili, arguidu DMS kaer iha ofendida nia faru riba ofendida monu ba rai hafoin lori liman buti ofendida nia kakorok, lori liman tuku dala ida kona iha ofendida nia ibun kuak, no lori liman kukun rakut ofendida nia hasan sorin karuk, arguidu kaer odamatan riba ba rai nunee mak odamatan habit ofendida nia liman fuan.
Konsekuensia direita husi agresaun fizika nee ofendida hetan moras makas iha kotuk laran, moras iha kakorok, kanek nakles no fitar to agora, moras makas iha ibun kuak, bubu no metan, moras makas iha hasan sorin karuk, ran sai barak no kanek nakles.
Iha momentu nee ofendida ba halo tratamentu iha PRADET.
Kauza husi problema nee tanba arguidu ho ofendida diskute malu kona-ba osan, nunee mak arguidu nervozu hodi akontese problema nee.
Arguidu DMS halo ho forma livre deliberada no konsientemente, hatene katak, kaer iha ofendida nia faru riba ofendida monu ba rai hafoin lori liman buti ofendida nia kakorok, lori liman tuku dala ida kona iha ofendida nia ibun kuak, no lori liman kukun rakut ofendida nia hasan sorin karuk, arguidu kaer odamatan riba ba rai, nunee mak odamatan habit ofendida nia liman fuan, nudar meiu neebe aptu hodi hamosu ofensa ba ofendidu nia isin lolon no saude.
Arguidu hatene katak, nia hahalok nee proibidu no punidu tuir lei penal. Tanba nee Konstitui arguidu DMS, nuudar autor material ho forma konsumadu ba pratika krime ofensa ba integridade fizika simples ho forma violensia domestika 1 (ida), previstu no punidu tuir artigu 145 hosi Kodigu Penal konjuga ho artigu sira 2, 3 alinea d) no art. 35º alinea b) hosi Lei Kontra Violensia Domestika n.º 07/2010, loron 07 fulan julhu.
Hatan ba akuzasaun neebe iha arguidu deklara katak, faktus neebe konsta iha akuzasaun loos hotu kedan.
Arguidu deklara, sira hahu moris hamutuk iha tinan 2019 no sira hela hamutuk, iha oan nain rua. No akontese problema iha kos neebe agora dadaun sira hela ba.
Arguidu rekonhese halo agresaun hasoru lezada, motivu tanba osan arisan neebe arguidu halo simu tarde, ho ida nee lezada husu osan arguidu nervoju maka baku lezada.
Arguidu deklara, depois akontesimentu sira diak malu fali, hahu husi neeba mai too agora la iha problema ona, arguidu mos la halo tan aktu nee.
Lezada reforsa tan akuzasaun katak, hahu husi akontese problema too mai iha agora la iha tan problema ona.
Rona tiha arguidu no lezada, Tribunal husu atu tama kedan ba iha faze alegasaun.
Iha alegasaun Prokurador Estajiadu husu Tribunal, atu aplika pena multa $ 40 ba arguidu, tanba arguidu konfesa integralmente ba iha faktus.
Aleinde nee, Defeza Marsal Mascarinhas deklara katak, arguidu arepende ba nia hahalok, tanba nee husu Tribunal atu aplika pena Admoestasaun ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Singular Ivan Patrocenio, Ministeriu Publiku reprezenta husi Prokurador Estajiadu, arguidu hetan asistensia legal husi Defensor Publiku, Marsal Macarinhas.
Jornalista: Terezinha De Deus
Editora: Carme Ximenes
