BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos konsidera komunidade Suku Uaitame neebe taka odamatan sede Suku ba funsionariu no Konselhu Suku, nee krime.
“Hau rona aktus ida taka odamatan sede Suku nee labele depois de avaliasaun hotu tiha ami sei tun ba haree saida mak akontese, ita sente la menta tebe-tebes nee labele, nee krime ita sei prosesa,” Veneranda hateten ba STL, iha salaun apuramentu Vila Nova, Baukau, Tersa (16/12/2025).
Veneranda katak, asaun taka odamatan Sede Suku Uaitame nee krime, tanba perturba servisu Administrasaun Suku, nunee bainhira prosesu avaliasaun kondisoens minimas ba implementasaun poder lokal iha Munisipiu Baukau remata, Autoridade Munisipiu sei tuun direita ba iha Edifisiu Suku Uaitame hodi identifika no prosesu asaun taka odamatan sede Suku.
Nia enkoraza, Timor Leste ukun aan tinan 24 ona prezisa sidadaun hakruk ba lei no hakarak Nasaun liu liu Munisipiu Baukau lao ba oin, tanba nee problema ruma iha la presiza taka odamatan Sede Suku, tanba fo impaktu ba atendimentu, nunee Autoridade Munisipiu Baukau sei seriu asuntu refere.
“Sekretaria Munisipal Asuntu Sosiais no Organizasoens ho Diretora AONG parese horseik sira tun ba ona rekoilha dadus sira nee hotu depois ami sei haree, se sente iha Munisipiu ami nia kbiit la too ami husu rekursu ba Nasional para tau sasan sira nee iha ordem,” Veneranda katak.
Nia informa, asaun taka odamatan Sede Suku ba funsionariu no Konselhu Suku Uaitame, Autoridade Munisipiu liu husi ekipa Sekretaria Munisipal Asuntu Sosiais no Organizasoens iha loron 15 Dezembru 2025 too ona iha sede Suku Uaitame no konsege rekoilha ona dadus balu, tanba nee Autoridade Munisipiu sei prosesa, maibe bainhira kbiit la too sei husu apoiu ba Ministeriu Administrasaun Estatal hodi reforsa no solusiona problema refere.
Entretantu atu fo hanoin fali ba publiku katak, asaun taka odamatan sede Suku Uaitame akontese iha loron 11 Dezembru 2025, hafoin remata konferensia imprensa kontra rezultadu votasaun husi Konselhu Konsultivu Munisipal (KKM) Baukau, neebe deside destinu Suku Uaitame hamutuk ho Postu Administrativu Kelikai Antigu, Munisipiu Baukau.
No liu husi entervista komunidade, Celestino Moreira hateten, razaun komunidade Suku Uaitame taka odamatan sede Suku, laos durante tinan ida Administrasaun Suku la lao, maibe taka odamatan Sede Suku, tanba komunidade la aseita atu ba Postu Kelikai Antigu.
Jornalista:.Tomas Reis
Editora: Carme Ximenes
