DILI, STLTIMORLESTE.com – Oras nee daudaun bebe nain tolu (3) hela hamutuk ho inan iha Prizaun Gleno, hodi kumpri kona-ba kastigu sira neebe iha.
Dehan Diretor Diresaun Nasional Servisu Prizional Reinsersaun Sosial, Delfio Alves ba jornalista sira, iha Kaikoli, Tersa (16/12/2025).
“Informasaun no dadus neebe tama mai hau hanesan Diretor Nasional nee, iha labarik bebe nain tolu maka iha neeba, maibe atu hato ba ita boot sira katak, banhira sira situasaun gravida nee antes de sira tama mai iha Prizaun laran, signifika katak buat hotu akontese iha liur mai maka gravida iha neeba,” dehan Delfio ba jornalista sira, iha Kaikoli, Dili, Tersa (16/12/2025).
Nia hatutan, bainhira sira partus Estabelesementu Prizional tolu nee liu liu nia Diresaun Nasional kaer prinsipiu ida mak, tratamentu dignu. Tanba nee atu partus fasilita sira lori ba iha ospital, no bebe moris mai ho kondisaun diak.
Maibe Prizaun halao lina koordenasaun ho Ministeriu relevante liu liu Ministeriu Solidariedade Sosial (MSSI) ho parseru sira kontinua haree ba bebe nain tolu nee, neebe oras nee dadaun iha neeba hela kontinua simu asistensia nesesidade baziku ba bebe nian. No apoiu husi MSSI husi Diresaun Nasional mos halo esforsu atu apoiu bebe nain tolu nee.
Nia dehan, bebe nia inan sira mos hetan hotu asistensia nesesidade baziku, no lei mos hateten labarik sira bele hela iha neeba bele halo tinan rua ka tolu, kuandu liu husi nee sira tenke fila ba hela ho sira nia familia, ka ema neebe sira nia inan tau fiar ba.
No tuir dadus neebe iha Prizaun Preventiva iha Bekora 66, Prizaun Preventiva iha Gleno 05, Prizaun Preventiva iha Suai 13, no hamutuk 84.
Prizaun Kondenadu iha Prizaun Bekora 354, Prizaun Kondenadu iha Gleno 93, Prizaun kondenadu iha Suai 108, hamutuk 555. Husi numeru nee iha prizaun Bekora dadur hamutuk 420, prizaun Gleno dadur hamutuk 98, prizaun Suai dadur hamuruk 121 no sura husi Prizaun tolu nee hamutuk 639. Rezidenssia iha nain 10 iha Prizaun Bekora, nain 5 Prizaun Gleno, nain 5 prizaun Suai, hamutuk 20.
Nunee mos moras mental iha Prizaun Bekora 23, prizaun Gleno 01, prizaun Suai 02, hamutuk 26. Dadur feto iha Prizaun Gleno 21. Dadur juvenil prizaun Bekora 36, prizaun Gleno 01, prizaun Suai 02, hamutuk 39. Dadur estranjeiru prizaun Bekora 14, Prizaun Gleno 04, hamutuk 18.
Iha fatin ketak, Akademiku UNTL Rafael de Jesus dehan, husu atu tau matan ba bebe sira neebe hela ho inan iha prizaun.
“Hau hanoin importante kria kondisaun diak ba bebe nain tolu ho nia inan, maski sira nia inan hetan kondenasaun,” dehan nia.
Jornalista: Terezinha De Deus
Editora: Carme Ximenes
