DILI, STLTIMORLESTE.com – Preszidente Republika (PR), Jose Ramos Horta husu Tribunal liu-liu Prokurador Jeral Republika (PJR) tenke prosesa lalais kazu roo Haksolok, tanba estraga osan estadu.
Prezidente Republika, Jose Ramos Horta hatoo kestaun nee ba jornalista sira, bainhira remata entrega kondekorasaun ba Embaixador Japaun iha Timor Leste, iha Palasiu Prezidensial Nicolau Lobato, Bairru Pite, Tersa (16/12/2025).
Nia dehan, Roo Haksolok nee TL gasta osan US$ 30 miloens iha Dr Mari alkatiri nia tempu bainhira nia autoridade iha Oecusse, depois US$ 14 milhões tan tempu Taur Matan Ruak nia Governu aitonka. Nee mak halo Prezidente Republika frustadu los, tanba sa mak Timor bele monu ba buat ida nee, primeiru tau tiha osan kompletu 13 ka 14 miloens fo tan fali 14 miloens besik US$ 30 miloens agora TL mak sosiu maioritariu iha portu nee.
Prezidente dehan, halo biskleta ida mos lakonsege, halo jestaun ba halo fali negosiu harii roo ahi, no fo konfiansa neebe bosok ona iha premeiru faze nee, ida nee Prezidente mos la komprende maibe ida nee entrega ba Prokurador Jeral.
“Maibe hau lakohi halo buat sira nee politiza bainhira Dr Mari nuudar Autoridade iha Oecusse halo nee nia halo ho intensaun para iha roo ahi ida modern, maibe kompanha husi Portugal nee mak la honestu, kompanha nain no familia gasta osan laselu trabalhador sira projetu nee abandonadu too agora,” dehan PR Horta.
Kazu Roo Haksolok oras nee dadaun iha ona Tribunal Prezidente husu tenke prosesa lalais kazu Roo Haksolok.
“Tenke prosesu lalais, prokurador Jeral Republika tenke aselera prosesu nee, tinan hira nia laran ona halo investigasaun. Investigasaun ema ba halo viajen iha neeba ba mai rejultadu laiha,” dehan nia.
Iha fulan kotuk Prokurador Jeral Republika Nelson de Carvalho hatete, investigasaun ba roo haksolok kuaze too ona konkluzaun, ou faze investigasaun iha ona 70% entau hela 30% maibe ida nee partense ba iha prokurador titular ninia serbisu.
Jornalista: Emerenciana Pinto
Editora: Domingas Gomes
