DILI, STLTIMORLESTE.com – Prezidente Republika (PR) Jose Ramos Horta hatete, lalika kestiona ka koalia ona kona-ba legalidade Prezidente Tribunal Rekursu Afonso Carmona neebe Prezidente Republika nomeia nee inkonstitusional, tanba uluk FRETILIN mos la pose membru governu nain 9.
Prezidente Republika Jose Ramos Horta haktuir liafuan nee ba Jornalista iha Palasiu Prezidensial Nicolau Lobato, Bairru Pite, Tersa (16/12/2025).
Nia hatete, semak dehan nomeia Prezidente Tribunal Rekursu nee inkonstitusional, tanba PTR mos serbisu tribunal tinan barak, tanba nee lalika protesta.
“Semak deklara inskonstitusional tribunal ida neebe, segundu sira be koalia konaba viola konstituisaun nee hau hatete nunee nain ulun sira ita boot sira halo saida iha 2020 no 2021. Prezidente Republika ita lahatene nia Prezidente Republika ka Prezidente Partidu FRETILIN, tanba nia nunka rejigna aan nuudar Prezidente Partidu FRETILIN, nia nunka rejigna aan depois lafo posse ba membru governu nain 9 ka liu tan nee ilegal inkonstitusional. Depois Governu ida foun mai atu tama CNRT, PD Khunto, tuir buat hotu hotu neebe Prezidente Republika eziji tenke halo kongresu extraordinariu, sira halo fulan rua hein Prezidente FRETILIN, Prezidente RDTL lahalo desizaun derepente mosu Governu aitonka tanba sa. Tanba Prezidente Republika, Prezidente Partidu hamutuk ho Sekretariu Jeral FRETILIN oferese fatin Visi Primeiru Ministru ba Khunto, entau Khunto halai sai tiha husi koligasaun. Khunto, CNRT, PD tama Governu Aitonka nee manobra, nee konstitusional ka la konstitusional diak liu lalika koalia ba ida nee,“dehan PR Horta.
Horta hatete, buat hotu IX Governu halo dehan sala, ida nee hakarak rona liu tan sesta bazika, maibe Prezidente dehan programa fahe sesta bazika nee nia rasik haree ho matan iha Oecusse no Dili, Governu selu US$ 25 ba sesta bazika ida, maibe loke fali sesta bazika neebe povu simu hatudu ba Prezidente Horta haree kompara ba sosa iha Lita Store ho Bekora latoo US$ 10, maibe governu selu US$ 25.
Xefe Estadu hatete, PTR mos halao serbisu iha UNTAET nia tempu, no sira hotu iha tempu UNTAET nian, neebe tanba saida mak la promove nia, karik tanba manobra no politizasaun karik ba sira neebe ligasaun ho partidu ruma karik.
Nia afirma, bainhira kritika bebeik, Prezidente sei kandidata aan fali ba iha tinan 2028 mai, se nonok Prezidente la kandidata aan.
Jornalista: Emerenciana Pinto
Editora: Domingas Gomes
