BAUKAU, STLTIMORLESTE.com – Kareta Baskolante ida hetan asisdente iha estrada publiku area Waisa, Aldeia Ossoua, Suku Tirilolo, Postu Administrativu Baukau Vila, Munisipiu Baukau, rezulta pasajeiru nain 3 mate fatin, nain 1 ain parte loos kotu.
Vitima Grigorio da Silva konta, kareta baskolante ida neebe hetan asisdente trafegu iha Waisa aluga husi ekipa Programa Nasional Dezenvolvimentu Suku (PNDS) Nahareka ho folin US$ 300.00 atu ba Dili tula material paralon. No sai husi Suku Nahareka tula ho ekipa PNDS Suku nain 3 iha loron 16 Dezembru 2025, tuku 09:00 parte dader, no kondutor mos tula tan pasajeiru liu nain 20 kompostu ema boot no labarik kiik ho sasan hanesan bua mama, nuu fuan maran no seluk tan atu ba Dili.
Husi pasajeiru ema nain 20 resin balu atu ba partisipa oan nia serimonia graduasaun no balu atu ba halo negosiu. Durante viajen husi Nahareka deskansa dahuluk iha area Aslaitula no kontinua viajen deskansa iha Vila Antiga ho kondisaun diak. hafoin remata deskansa iha Vila Antiga besik atu ba tuku 13:00 kontinua viajen no too iha area Lanud kundotor foti estrada diresaun Lanud-Kairavela no too iha area Waisa, Aldeia Ossoua hetan asisdente refere.
“Ami too iha Lanud super dehan liu husi dalan foun nee mak diak, nee mak ami tun too iha estrada tuan tikungan nee mak derepende kareta baku fila. Halai ho velosidade tun ba rem laiha,” Grigorio hateten ba jornalista sira hafoin remata asistensia saude iha sala emerjensia HoREX Baukau, Tersa (16/12/2025).
Nia informa, husi asidente refere ema nain 3 kompostu feto negosiante ida, ekipa PNDS Suku Nahareka ida no pasajeiru nain ida hanesan aman atu ba partisipa nia oan nia serimonia graduasaun iha Universidade da Paz mate iha fatin asidente inklui pasajeiru feto ida ain parte loos kotu no pasajeiru seluk balu hetan kanek grave no balu hetan kanek kmaan.
Hafoin hetan asidente parte ambulansia mos too kedas fatin hodi tranporta vitima sira ba sala emerjensia Hospital Rejional Eduardo Ximenes (HoREX) Baukau hodi fo asistensia saude no transporta vitima nain 3 seluk nia mate isin ba sala mortuariu HoREX Baukau neebe tuir planu sei transporta ba matebian sira nia rezidensia iha Suku Nahareka, Postu Ossu.
Iha sorin seluk, Mediku Sala Emerjensia HoREX Baukau, Mario Sarmento informa, relasiona asidente neebe akontese iha area Waisa, parte sala emerjensia simu pasiente hamutuk nain 19 kompostu ema boot no labarik, maibe nain 7 mak kondisaun grave, tanba hetan pankada makaas hetan tohar iha nia ain, liman no trauma kapites, enkuantu pasiente seluk kondisaun kanek kmaan.
“Nain 7 mak kondisaun grave, seluk kondisaun kmaan, nain 1 mak lakon nia ain sorin parte loos, tanba nee doutor sira halo ona reparasaun ba nia kanek sira nee atu refere ba Dili,” Mario informa.
Nia katak, husi pasiente nain 7 neebe hetan kanek grave mediku sira halo ona reparasaun ba kanek sira no tuir planu sei transfere uluk pasiente feto neebe lakon ain sorin parte loos (ain kotu) ba Hospital Nasional Guido Valadares (HNGV) Dili no pasiente grave seluk sei kontinua observa iha sala sirurjia HoREX Baukau, maibe bainhira espesialista sira observa mak kondisaun prezisa transfere ba HNGV, HoREX sei transfere. No husi asidente refere iha pasajeiru nain 3 mate fatin maibe HoREX la rejistu.
Enkuantu asidente refere involve husi baskolante ho sapa matrikula A.65.916 neebe kondus husi kondutor naran baibain bolu Manubela.
Entretantu too notisia nee publika STL hetan komentariu husi Komadante Komando Polisia Munisipiu Baukau, maibe informasaun neebe STL asesu husi Polisia Tranzitu Munisipiu Baukau neebe atende asidente refere katak, asidente nee akontese deskonfia kondutor konduz kareta ho velosidade no too iha kruzamentu Waisa, Aldeia Ossoua hetan asidente, tanba lakon kontrolu.
Jornalista: Tomas Reis
Editor: Xisto Mendonça
