DILI, STLTIMORLESTE.com – Sekretariu Estadu Asuntu Toponomia no Organizasaun Urbana (SEATOU) sobu stand feira neebe loke iha Palasiu Prezidensial Nicolau Lobato, Bairo Pite.
Iha biban nee Sekretaria Estadu Germanu Santa Brintes Dias hatete, tun sobu stand iha palasiu hodi evita engrafamentu husi Bairru Pite tun mai Palasiu oin, tanba nee mak SEATOU simu orientasaun mai halo serbisu, no fatin neebe faan sasan baratu nee ministru la autoriza, se loke iha palasiu entau merkadu neeba funsaun laiha ona.
“Bazar baratu nee markadu mos faan baratu hela. Ita haree deit bazar baratu etu kotak hotu, nasi goren mai hotu iha, nee bazar baratu oinsa. Ba neebe hotu hotu tenke kopera no kolaborasaun diak para halo serbisu diak. Se ministru dehan loke iha 30 deit iha hotu jardim Igreza Moteal nia kotuk, hotu hotu tama iha laran para fasil atu kontrola,” dehan nia ba jornalista iha Palasiu Prezidensial Nicolau Lobato, Bairo Pite, Kuarta (17/12/2025).
Nia hatete, sobu tiha stand iha Palasiu Prezidensial oin nee sei ba halao serbisu too iha Tasitolu no Cristu Rei, Becora, no espasu publiku sira tenke husik.
“Stand Palasiu Prezidensial nia oim mutin ida iha neeba nee ita husik ba Palasiu laran, no espasu publiku nee ita labele okupa, husik para ema hotu hotu lao. Se loke iha laran entau husik loke iha Palasiu laran, liur labele i liur nee ita kontrola,” katak nia.
Nia hatete, negosiante neebe mak ohin loke feira ou tau stand iha Palasiu oin lahetan autorizasaun husi Ministru atu loke iha espasu publiku, tanba nee Sekretariu Estadu simu informasaun mai halo serbisu.
Nunee mos Negosiante Adelina Freitas hatete, antes nee sira ba iha MCI no MCI haruka mai iha Palasiu Prezidensial, no ekipa hakerek hela numeru, naran no numeru grupu no aban fali kontaktu katak naran iha ona Munisipiu Dili, tanba nee sira ba fali Munisipiu Dili no sira rejistu US$ 20.
“Sala nee laos ami mak sala, maibe komisaun nee mak sala hodi halo terus ami. Ami terus dala barak ona, mai nee laos Governu mak fo han ami, maibe ami buka rasik mak uza ba han no hemu laos sira mak fo han ami,” dehan negosiante nee.
Nia hatete, sira rejistu no kada ema ida US$ 20 no selu iha Munisipiu Dili, maibe derepente deit SEATOU sobu kedas.
Jornalista: Emerenciana Pinto
Editora: Domingas Gomes
