DILI, STLTIMORLESTE.com – Embaixador Indonezia ba Timor Leste (TL), Okto Dorinus Manik hatoo saudasoens Natal ba Prezidente Republika (PR), Jose Ramos Horta.
Bainhira remata hasoru malu, Embaixador Indonezia ba Timor Leste, Okto Dorinus Manik ba jornalista sira iha Palasiu Prezidensial Nicolau Lobato, Bairo Pite, Kuarta (17/12/2025) hatete, ohin hasoru Prezidente laos koalia buat seluk, maibe mai hatoo deit saudasoens Natal ba Prezidente Republika Jose Ramos Horta, tanba Embaixador atu ba Indonezia.
“Ohin dader iha hau nia enkontru ho Prezidente, laiha asuntu substansial sira atu deskuti, so saudasaun Natal nian deit, tanba ohin hau atu ba Jakarta ba feriadu Natal nian. Klaru, nuudar maun ida, hau tenke hatoo kumprimentu Natal nian ba nia. Ba hau, ida nee importante. Nuudar família, ita labele haruka deit mensajen ba nia, ita bele haruka kumprimentus Natal ba nia iha WhatsApp. Diak liu atu dezeja Natal, feriadu ksolok, no saude diak ba nia iha oin. Ita bele konhese malu diak liu tan nuudar família ASEAN,” dehan Embaixador.
Embaixador Indonezia ba Timor Leste dehan, iha hasoru malu nee la koalia buat seluk, maibe koalia ou laiha kestaun espesífiku sira. Iha futuru, karik bele hametin liu tan nia relasaun.
“Lori hau nia naran no Embaixada Indonezia nia naran, hau hatoo Boas Festas Natal no Tinan Foun Ksolok 2026. Bele lori ksolok no dame ba ita nia maun alin sira hotu iha Timor Leste,” dehan Embaixador.
Nia hatete, foin lalais sira mos halao ona selebrasaun Natal oin-oin ba ema Indonezia sira iha Dili, liu-liu komunidade.
Provavelmente sei iha nafatin selebrasaun Natal nian too Janeiru, no iha mos igreja Indonezia oin-oin neebe selebra iha nee.
“Ami sei iha eventu ida ba igreja sira hotu, sarani Indonezia sira hotu, no ami sei konvida mos ami nia maluk sira neebe laos sarani atu mai hamutuk ho ami iha selebrasaun Natal nian. Hau kontente haree aman no inan sira hotu iha tinan nee nia rohan. Hau hein katak jornalista sira hotu saudavel, no hau hatoo Boas Festas Natal ba ema hotu,” katak nia.
Iha hasoru malu nee Prezidente Republika Jose Ramos Horta hatoo Boas Festas Natal ba Embaixador no povu Indonezia iha Timor Leste nomos família, tanba Prezidente ho embaixador hanesan mesak maun-alin no familia ida deit iha ASEAN.
Labele haketak malu, fuan nafatin ida deit, liu-liu tanba Timor Leste ofisialmente estabelese nuudar ASEAN.
Jornalista: Emerenciana Pinto
Editor: Xisto Mendonça
