DILI, STLTIMORLESTE.com – Foin daudaun iha loron 16-17 Dezembru 2025 vitima hamutk 92 hatoo keixa ba Polísia Nasionál Timor Leste (PNTL), tanba sira konsidera kompanhia Raimakmor Lda, neebe lidera husi Armando Ximenes bosok sira hatama osan atu hetan kreditu, maibe too agora laiha rezultadu no informasaun ba sira.
Observasaun STL nia iha terenu, vitima sira nee deklara ba PNTL katak empreza Raimakmor bosok sira kada ema hatama US$ 100.00 atu bele asesu ba kreditu entre US$ 1000.00 no se mak hatama US$ 1500.00 bele asesu ba kreditu US$ 15,000.00, nunee sira hatama tiha, maibe besik tinan ona osan kreditu nee Raimakmor la fo. Tanba nee sira ezije atu Raimakmor dezenvolve sira nia osan neebe sira hatama ona.
Entretantu maioria vitíma sira nee mesak terseira idade hanesan mos tos nain, inklui balun fila liman iha merkadu. Vitima sira nee mai husi Munisípiu Baukau, Vikeke, Ermera, Manufahi, Oekusi no balun iha Díli.
Iha fatin hanesan, Diretor Jerál kompanhia Raimakmor Lda, Armando Ximenes hatoo deskulpa ba sidadaun sira neebe hatama osan ba kompanhia Raimakmor.
“Primeiru hau hatoo deskulpa ba ita boot sira, no dala ruma ita boot sira hanoin katak fo osan nee halo buat seluk, maibe ita haree ba sistema nee, neebe iha estrutura mos iha neeba nia diresaun. Hau inisiador inisia para programa nee lao diak, maibe ezekusaun nee laos hau mak kaer direita, osan nee laos hau mak kaer direta, hau la simu direita ema ida nia osan,” hateten Diretor Jerál kompanhia Raimakmor Lda, Armando Ximenes ba jornalista sira wainhira hasoru malu iha Komando Polísia Eskuadra Vera Kruz, Dili, Kuarta (17/12/2025).
Nia informa, problema nee Kompanhia Raimakmor mak demora ezekusaun, tanba nee mak balun atu rezigna aan, formulariu ida mos antes nee fo ona, sese mak rezigna aan nee priense hodi bele trata asuntu nee dala ida.
“Ida nee ita iveste laos kliente, tanba nee hau horiseik nee atu haree, tanba ezekusaun mos sai barak, maibe ate agora no orsida mos ami sei koalia, tanba ezekusaun barak mos sira la envolve fila mai Kompanhia Raimakmor,” nia deklara.
Diretor Jerál Raimakmor informa, tanba nee iha garantia katak sira Ermera no Díli balun hakarak atu rezigna aan, prontu ohin iha nee akordu asina ona katak iha loron 26 Janeiru 2026 tenke rezolve maibe hotu-hotu lori ho resibu banku.
“Iha balun la iha resibu banku ita la hatene husi neebe, hau fiar katak sukursal barak sei lao hela, maibe dala ruma maluk sira balun deskonfia mais hau buat hotu entrega ba Maromak. Neebe hau iha responsabilidade para atu rezolve problema sira nee too hotu, tanba hau mak inisia kompahia Raimakmor,” nia koalia.
Karta akordu neebe STL asesu, hatudu katak nee asina husi responsavel masimu, Prezidente ka Kompanhia Raimakmor L.da, Armando Ximenes, Xefe Diretor Investimentu Martinho de Sá, Vise Prezidente Komisariu, José Luis da Costa Oliveira, Diretora Finansas Goreti Efendy Maria, hodi kompromete rembolsa vitíma sira nia osan iha loron 26 Janeiru 2026.
Jornalista: Jeniche da Costa
Editor: Xisto Mendonça
