BAUKAU, STLTIMORLESTE.com – Iha loron 17 Dezembru 2025 parte meudia mosu asidente trafegu iha area Sukaer laran, Suku Vemasi, Postu Administrativu Vemasi, Munisipiu Baukau, rezulta motorista mate fatin.
Responsavel Servisu Edukasaun Promosaun iha Sentru Saude Vemasi, Julio Amandio Belo Soares haktuir, asidente refere involve husi motor revo fit sapa matrikula Z 8182 neebe konduz husi sidadaun João Lopes husi Suku Defawasi, Postu Baguia, Munisipiu Baukau, neebe diresaun husi Baukau atu ba Dili no too iha area Vemasi Sukaer laran hetan asidente refere, tanba soke hetan pankada iha parte rentos hodi rezulta mate fatin.
“Agora daudaun mate isin iha hela Sentru Saude Vemasi. Nia kronolojia lo-loos ami la hatene, tanba ami iha deit servisu fatin, maibe akontesimentu nee kedas lakon iis iha neeba mak ambulansia lori deit mai iha Sentru,” Julio informa ba STL liu husi telefone, Kuarta (17/12/2025).
Nia sublina, hafoin asidente refere akontese, vitima hakotu kedas nia iis iha fatin akontesimentu, maibe parte ambulansia husi Sentru Saude Vemasi too kedas iha fatin akontesimentu hodi evakua matebian nia mate isin asegura iha sala mortuariu Sentru Saude Vemasi.
Nia fundamenta, parte familia husi matebian mos too kedas iha Postu Vemasi atu transporta matebian nia mate isin ba nia rezidensia.
“Ohin too mai ami hamoos kedas ona matebian nia kanek, nia familia mos agora too ona hein karu funerariu para atu lori ba fatin. Matebian hetan pankada iha rentos baku makaas neebe fera kedas,” Julio akresenta.
Entretantu tuir informasaun husi fontes ida lakohi temi nia identidade husi fatin akontesimentu ba STL katak, matebian mesak ho motor soke sinais tranzitu iha estrada ninin. Hafoin akontese asidente refere parte Polisia Eskuadra Postu Vemasi too kedas fatin no asegura ona motor refere iha edifisiu Polisia Eskuadra Vemasi.
Jornalista: Tomas Reis
Editor: Xisto Mendonça
