BAUKAU, STLTIMORLESTE.com – Autoridade Munisipiu Vikeke preokupa kondisaun estrada husi Vikeke Vila ba Postu Administrativu sira, tanba kondisaun aat, nunee avalisaun kondisoens minimas ba implementasaun politika Poder Lokal, mak parte ida Governu fihir husi kondisoens infraestrutura posibilidade Munisipiu Vikeke sei la priense kriteriu hodi simu Poder Lokal, tanba ligasaun estrada kondisaun aat.
Prezidente Autoridade Munisipiu Vikeke, Francisco Cruz Simões de Gonzaga Soares hateten, ekipa avaliasaun kondisoens minimas husi nasional too ona iha Munisipiu Baukau no halo ona avalisaun ba kondisoens sira, maibe kondisaun estrada husi Postu Administrativu Vikeke Vila ba Postu Uatukarabau no Uatulari, inklui mos husi parte Aslaitula nomos husi Vikeke Vila ba Lakluta daudaun kondisaun aat no grave, iha neebe difikulta tebes komunidade sira nia movimentasaun ho transporte publiku no privadu.
“Ami problema mak dala nee, tan nee ita dehan prepara ba kondisaun miminu Vikeke haree ba infraestrutura ami araska,” Francisco informa ba STL liu husi telefone, Kinta (18/12/2025).
Nia katak, atu responde problema infraestrutura ho volume orsamentu boot parte Munisipiu laiha kompetensia atu ezekuta liu rihun US$ 500, tanba regula husi dekretu lei numeru 34/2025, nunee projetu ba estrada no infraestrutura seluk neebe ho valor orsamentu liu rihun US$ 500 responsabiliza husi Governu Sentral, tanba nee kondisaun estrada nasional sira iha Vikeke kondisaun kontinua aat, tanba seidauk halo reabilitasaun.
Nunee husu Governu Sentral atu tau atensaun seriu liu husi responde sedu liu liu ba kondisaun estrada hodi bele atinji mehi ba dezenvolvimentu, tanba infraestrutura hanesan estrada importante ba komunidade sira, atu asesu ho transporte hodi transporta produtu lokal sira husi baze ba merkadu inklui fasilita inan isin gravida sira, no kondisaun seluk sira bainhira iha nesesidade emerjensia.
Maibe Francisco katak, preokupasaun sira nee, Governu Sentral hahu responde ona liu husi anunsiu lista projetu ba estrada rural, neebe sei halo reabilitasaun estrada rural iha area Postu Ossu no Uatulari.
“Mezmu ida nee ita dehan rural maibe ajuda, nunee mos iha 2026 mai ita bele dehan katak, area Uatukarabau too mai area Vikeke, Vikeke too Natarbora komforme informasaun neebe ita rona tama ona iha planu Ministeriu Obras Publikas, atu halo konstrusaun ba estrada nee ita hein deit 2026, no Aslaitula nian nee hakarak ga lakohi lalais ona para ajuda ita nia ema sira,” Nia komenta.
Prezidente Autoridade Munisipiu Vikeke nee informa, tuir lo-loos kondisaun estrada Aslaitula parte kompanhia halo ona reabilitasaun iha tinan 2025, maibe iha diskusaun tekniku nunee seidauk implementa, maibe espera sei implementa iha tinan 2026 inklui ho diresaun estrada Postu Uatukarabau too Vikeke Vila kontinua ba Natarbora.
Jornalista: Tomas Reis
Editora: Carme Ximenes
