DILI, STLTIMORLESTE.com – Daudaun nee Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) hamutuk ho ekipa sekreta ezekuta mandadu tribunal nian hodi detein sidadaun mane ida ho inisial SX iha area Bairo Pite, tanba deskonfia oho nia aman iha Suku Karau Balu, Postu Administrativu Viqueke Vila, Munisipiu Vikeke iha loron 08 Dezembru 2025.
Portavoz Komandu Jeral PNTL, Superintendente Polísia João Belo dos Reis dehan, konaba kazu nee, ninia motivu tanba saida mak oho, nee seidauk hatene, maibe depois akontese suspeitu halai mai Dili, hodi koko subar husi nia aktu krime neebe nia komete deskonfia hasoru nia aman rasik too lakon vida.
Nia katak, hafoin kazu nee akontese iha semana kotuk nee, autoridade seguransa la tur nonok, maibe liu servisu ekipa konjunta ezekuta mandadu Tribunal nian, iha Kinta madrugada nee hodi kaptura suspeitu iha area Bairu-Pite neebe nia hela iha familia balun nia rezidensia.
“Kazu omesidu akontese ida iha parte Viqueque, depois ami hetan mandadu Tribunal detekta katak suspeitu halo movimentu ba parte seluk, nunee Komandu Munisipiu Viqueque halo servisu ho Komandu Jeral PNTL no servisu inteligencia sira hodi identifica. Horseik suspeitu kaptura iha parte Dili no lori ona ba Komandu Polisia Baucau hodi submete ba iha Tribunal,” informa nia ba jornalista sira liu husi konferensia imprensa iha salaun Ministeriu Interior, Kinta (18/12/2025).
Nia haktuir, bainhira mosu kazu omesidu neebe halo sidadaun nee lakon vida, Polisia liu husi Komandu PNTL Munisipiu Vikeke tun direta ba iha fatin akontesimentu krime hodi evakua mate-isin ba iha Ospital Nasional Guido Valadares (HNGV) hodi halo autopsia.
“Prosesu autopsia iha ona rezultadu, nunee mate isin entrega ona ba família hodi halo prosesu funebre. Kazu nee akontese iha semana kotuk liu ba, tanba nee motivu ami seidauk bele koalia,” nia informa.
Entretantu Suspeitu SX Komandu PNTL Munisipiu Baucau halo ona detensaun hodi kumpri oras 72, molok aprezenta ba Tribunal Judisiariu Primeiru Instansia Baucau hodi halo julgamentu primeiru interrogatoriu.
Jornalista: Jeniche da Costa
Editora: Domingas Gomes
