DILI, STLTIMORLESTE.com – Prezidente Tribunal Rekursu (PTR), Afonso Carmona hatete, Konselhu Superior Majislatura Judisial (KSMJ) aprova programa Anu Judisial Tribunal nian no publika ona iha Jornal da Republika.
Nia dehan, iha atividade ida naran Anu Judisial, ba nasaun hotu sempre iha atividade ida nee, nia diferente ho kalendariu judisial konta husi 1 Janeiru too iha loron 31 fulan Dezembru, maibe Anu Judisial Tribunal atu halo nia relatoriu durante tinan ida nee au mesmu tempu loke servisu ba tinan foun.
“Iha Timor seidauk halo ida nee, hau koko inisiativa lori ba Konseluh aprova 3 Dezembru hanesan Anu Judisial Tribunal Timor nian, no kada tinan 3 Dezembru sei relata atividade Tribunal nian ba iha publiku,” dehan Carmona ba jornalista sira iha Kaikoli, Dili, Kinta (18/12/20250.
Nia hatutan, ema sempre kestiona servisu Tribunal nian, husi Ministeriu Publiku (MP) relata ba iha Parlamentu Nasional (PN), tanba nee liu husi Anu Judisial sei publika ba ema hotu liu husi seksaun solene. No tuir loloos halao iha loron tolu fulan nee, maibe Konselhu aprova tiha halo atividade tarde uitoan, tanba nee termina iha loron 19 atu halao sesaun solene, maibe tinan oin sei halao iha loron 3 fulan Dezembru.
Temi Anu Judicial atu relata atividade, signifika katak kazu hirak maka Tribunal kaer no kazu hirak maka pendente, Juiz numeru hira, ofisial numeru hira atu hare numeru hirak nee sai Tribunal nia forsa ka, sai Tribunal nia fraku, presija atu aumenta numeru ka, oinsa atu rezolve.
Tribunal tenke iha nia atividade no nia forma rasik, atu garante tuir konstituisaun haruka. Atu kompleta liu tan presiza saudavel konvida Tribunal haat nee mai hotu hodi realiza atividade desportu.
Tanba foin primera vez halo atividade Anu Judisial, Konselhu mak determina no apresia Konselhu nia hanoin diak ba Tribunal nee hodi aprova. Tanba haree iha referensia barak tenke iha lei maibe iha referensia dehan, iha lei mos bele se Konselhu deside mos bele, entaun Konselhu diside tiha no publika iha Jornal da Republika loron 3 hanesan Anu Judisial.
Iha fatin ketak, Jurista Jose Maria Guterres dehan, planu sira hanesan nee diak, atu bele fo sai servisu Tribunal nian ba iha publiku.
“Planu sira hanesan nee diak, tanba publiku balu la dun entende servisu Tribunal nian, liu husi relata atividade sira ne atu sira bele hatene diak liu tan servisu Tribunal nian,” dehan nia.
Jornalista: Terezinha De Deus
Editora: Carme Ximenes
