DILI, STLTIMORLESTE.com – Prezidente Republika (PR) Jose Ramos Horta hatudu domin ba Orfonatu Santa Clara, liu husi apoiu parsel natal ho nesesidade baziku hodi haksolok iha tempu natal.
Prezidensia Republika liu husi Xefe Kaza Sivil no Xefe Kaza Militar akompanh husi sosiedade sivil no asuntu sosial husi Prezidensia Republika, apoiu parsel natal no nesesidade baziku ba orfonatu Santa Clara iha Ailok Laran.
Xefe Kaza Sivil Prezidensia Republika, Jesuina Maria Ferreira Gomes dehan, bainhira tama ona tempu natal, Prezidente Republika iha nia inisitiva no programa ida atu fahe parsel natal nomos nesesidade baziku ba sira neebe presiza liu. Hanesan labarik sira iha orfonatu, labarik defisiensia sira, ema moras iha hospital, maluk sira neebe iha prizaun, nomos komunidade sira seluk neebe vulneravel presiza atu apoiu.
“Parsel ho nesesidade baziku sira nee atu hatudu Prezidente Republika nia domin ba komunidade, oan, beioan sira, liu-liu atu selebra loron natal neebe Jesus moris. Natal ita hatene katak, Jesus moris lori ksolok, lori domin, pas, esperansa ba ema hotu-hotu, tanba nee mak Prezidente Republika foka liu ba grupu sira neebe presiza tebes apoiu no tulun, nunee sira bele sente ksolok, kontente hodi selebra Jesus nia moris,” dehan nia ba jornalista iha Orfonatu Santa Clara Ailok Laran, Kinta (18/12/2025).
Nesesidade bazika neebe fahe ba orfonatu mak hanesan foos, manu tolun, sardina lata sira nee, iha mos nesesidade ba labarik sira hariis hanesan eskova, pepsodent, no seluk tan.
Nia dehan, apoiu ba orfonatu nee laos deit natal mak Prezidente Republika fo apoiu lae, kada fulan Prezidente Republika liu husi servisu sosiedade sivil mai fo apoiu iha nee. Labarik sira iha orfonatu nee hamutuk 26 pesoas, balun husi Aileu, Ossu, Dili neebe inan-aman laiha posibilidade selu labarik sira no mos sira iha difikuldade iha uma hela ho inan-aman sira, entaun Prezidente Republika fo orientasaun lori sira mai tau iha orfonatu nee.
Nunee mos Madre Maria Antonia de Jesus (FCJM) hatoo agradese tebes ba Prezidente Republika Jose Ramos Horta neebe mak apoiu orfonatu sira, tanba tinan kotuk mos hetan parsel natal husi Prezidente.
“Ami nia kongregasaun sente orgullu, liu liu bele hetan parsel Natal husi ema boot nasaun, nia numeru um nasaun nee nian. Ami husi parte orfonatu nia no madre sira sente orgullu tebes ho Prezidente nia fuan neebe mak nakonu ho domin boot ba oan kiak, tanba nee husi ami hatoo agradese tebes ba Prezidente nomos Asesor Quintilano neebe mak durante nee hakaas aan tulun ami sai matan dalan ba ami,” dehan Madre nee.
Iha fatin hanesan Madre Leonie, Manalu Franciscanae Filiae Santissimae Cordis Jesu et Mariae (FCJM) hatete, labarik iha orfonatu Santa Clara, labarik sira hamutuk 27, maibe ida atu estuda diak liu tan fali, hanoin iha komunidade kiak, atu nia buka aprende barak. Ezemplu iha uma tein hahan nunee nia aban bainrua bele harii an, entaun agora labarik sira hamutuk nain 26.
Nia dehan, husi nain 26 nee, sira neebe eskola 23, nain tolu mak seidauk eskola.
Iha biban nee madre hatoo agradese ba Prezidente Republika Jose Ramos Horta neebe apoiu ona orfonatu nee, no madre sira nafatin reza ba Nain tulun Prezidente no Primeiru Ministru saude diak nafatin hodi tulun povu kbiit laek neebe presiza tebes tulun.
Jornalista: Emerenciana Pinto
Editora: Domingas Gomes
