DILI, STLTIMORLESTE.com – Prezidente Republika (PR) Jose Ramos Horta liu husi Xefe Kasa Sivil, lori ksolok natal ba Komunidade Alma.
Prezidente Republika reprezenta husi Xefe Kaza Sivíl, Jesuína Maria Ferreira Gomes, vizita komunidade ALMA hodi hatoo votus boas festas natal nian neebe nakonu ho domin husi Xefe Estadu Jose Ramos-Horta ba labarik sira iha Kinta (17/12/2025).
Jesuína dehan, ho domin ba labarik sira, hodi refleta kona-ba Jesus nia moris neebe simples hanesan fonte inspirasaun ba promosaun ba valor hanesan simplisidade, hadomi malu, no dame iha uma laran.
Iha ambitu inisiativa, Prezidensia liu husi Unidade Servisu Sosiedade Sivíl no Asuntu Sosial, entrega ona apoiu esensial hodi sustenta komunidade nia nesesidade loroloron nian, inklui ai-han sira hanesan foos, manu-tolu no mina, nunee mos roupa ba labarik sira.
Xefe Kasa Sivil salienta, maske kontribuisaun material sira-nee kiik, buat sira-nee oferese ho domin boot no ho hakarak atu lori ksolok ba labarik sira iha tempu festivu nee.
Xefe enkoraja mos labarik sira atu laran-diak nafatin, estuda makaas, no rona Madre no funsionariu sira neebe dedika sira-nia moris loron-loron atu tau matan ba sira.
Haree ba futuru, Jesuína Gomes compromete-an nia aan atu hatoo ba Prezidente Republika no ba ministeriu governamental sira neebe kompetente kona-ba nesesidade espesífika Comunidade ALMA, liu-liu iha relasaun ho espansaun eskola terapia sira no infraestrutura alojamentu sira.
Jornalista: Emerenciana Pinto
Editora: Domingas Gomes
