DILI, STLTIMORLESTE.com – Maske kada tinan universidade sira produs graduadu, maibe kampu traballu menus iha rai laran.
Lia hirak nee hatoo husi Graduadu Fakuldade Ekonomia husi Universidade da Paz (UNPAZ) Antonio Martins da Costa ba STL, Sesta (19/12/2025).
“Realidade neebe ita iha, ita menus kampu servisu iha rai laran, maske ita nian universidade iha rai laran kada tinan produs ita nian graduadus hirak neebe remata sira nia estudu, maibe realidade barak seidauk hetan servisu, tanba ita laiha investimentu boot ruma atu bele absolve ita nian joven sira nee,” dehan nia.
Antonio hatutan, joven barak sai ba rai liur, hodi servisu iha ema nia rai atu bele hadia moris, tanba joven balun neebe remata ona estudu iha universidade, sira seidauk hetan servisu, tanba kampu traballu menus iha rai laran.
Iha fatin seluk, Diretor Ezekutivu TLCE, Jose Monteiro dehan, los duni too agora graduadu barak maka seidauk hetan servisu, no balun ba servisu iha rai liur, tanba iha rai laran nee menus kampu servisu halo graduadus barak sai ba servisu iha rai liur.
“Los duni too agora ita nia graduadu barak maka seidauk hetan servisu, no balun ba servisu iha rai liur, tanba iha rai laran nee menus kampu servisu, tanba ho kampu servisu neebe maka menus, halo graduadus barak sai ba servisu iha rai liur,” nia afirma.
Nunee mos Reitor ISC, Sebastião Perreia dehan, universidade prepara deit ema, agora liga ba menus kampu traballu, nee governu maka bele loke kampu servisu ba graduadu hirak neebe hotu ona estudu iha universidade, bainhira too tinan termina ona, nee sira hahu halao graduasaun.
Jornalista: Jacinta Sequeira
Editor: Domingas Gomes
