DILI, STLTIMORLESTE – Vise Primeiru Ministru (VPM) no Ministru Koordenador ba Asuntu Ekonomiku (MTA), Ministru Turizmu no Ambiente (MTA), Francisco Kalbuadi Lay ho Embaixadora Xina ba Timor-Leste asina ona akordu hodi apoiu konaba projetu kooperasaun importante rua hanesan Projetu Renovasaun Terraplen Kosteira no Projetu Jardin Estilu Xines Palasiu Prezidensial.
“Uluk nanain, hau hakarak hatoo ami-nia apresiasaun previa ba Governu Republika Populár Xina ba nia apoiu kontinua no kontribuisaun valiozu ba dezenvolvimentu Timor-Leste. Asistensia neebe fornese iha China Aid nia okos reflete amizade no parseria neebe metin entre ita-nia nasaun rua, bazeia ba respeitu mutuo, kooperasaun, no objetivu dezenvolvimentu neebe fahe,” deklara Francisco Kalbuadi Lay iha nia diskursu iha Sentru Konvensaun Dili (CCD), Sesta, (19/12/2025).
Tuir Vise-PM, Francisco Kalbuadi Lay, Projetu Renovasaun Terraplen Kosteira iha importansia boot ba Timor-Leste.
“Ita nia tasi-ibun maka ita-nia rikusoin natural ida neebe iha valor liu. Suporta ita-nia ambiente, ita-nia komunidade sira, no ita-nia atividade ekonomika sira, liuliu turizmu no peska. Liuhusi projetu ida-nee, ita bele proteje ita-nia area tasi-ibun sira hosi erozaun no impaktu klimatiku sira, enkuantu iha tempu hanesan hasae beleza natural hosi tasi-ibun Díli nian. Inisiativa ida-nee kontribui diretamente ba protesaun ambiental, reziliensia klimatika, no dezenvolvimentu urbanu sustentavel ba jerasaun agora no future,” afirma Vise PM.
Iha tempu hanesan, Projetu Jardin Estilu Xines Palásiu Prezidensiál nian reprezenta símbolu signifikativu ida ba interkámbiu kulturál no amizade entre Timor-Leste no Xina. Jardin nee sei enrikese paizajen Palasiu Prezidensial nian no fornese espasu ida neebe reflete armonia entre natureza, kultura, no tradisaun.
“Ida-nee mos sei sai hanesan lembransa vizivel ida kona-ba kooperasaun ba tempu naruk no ligasaun ema-ba-ema entre ita-nia nasaun rua,” haktuir Vise-PM.
Governu Timor-Leste haksolok atu konfirma ninia akordu tomak ho ambitu, enkuadramentu, no arranju implementasaun projetu sira-nee nian, hanesan trasa ona iha korespondensia foin lalais nee entre governu rua nee.
“Ami reafirma ami-nia kompromisu atu fornese apoiu nesesariu hotu-hotu atu asegura konstrusaun neebe lao ho diak no implementasaun neebe efetivu. Diresaun-Jeral ba Turizmu hetan dezignasaun nu’udar ajensia prinsipal governu nian hodi koordena no tau matan ba projetu sira-nee, hodi garante jestaun neebe diak no kuidadu ba tempu naruk.Obrigado dala ida tan ba Governu Xina no parseiru sira hotu neebe envolve. Ami fiar katak projetu sira-ne’e sei lori benefisiu sira neebe dura ba ami-nia povu, ami-nia ambiente, no ami-nia relasaun bilateral sira,”sublina Vise-PM.
Iha fatin hanesan, Primeiru-Ministru, Kay Rala Xanana Gusmão, agradese ba Governu Xina neebe sempre apoia Timor-Leste iha tempu luta ba libertasaun no mos iha tempu independensia nia laran.
“Embaixadora Xina, ita boot reprezenta Governu Xina, no Vise-PM reprezenta Governu Timor ba asina akordu ida nee. Nee katak, Xina sempre iha ami-nia sorin, laos deit iha tempu uluk apoia ba independénsia, maibe tempu agora mos Xina nafatin dezenvolve ami-nia sosiedade, no povu en jeral. Tanba nee, ami fo abrigado barak. No Haruka hela hau nia apresiasaun ba hau-nia kolega diak Prezidente Xina, Xi Jinping, no mos hau-nia tinan foun ba nia.
Projetu neebe asina ona nee fo konfiansa iha kooperasaun Xina ba TL nia dezenvolvimentu. Ami hatene iha tinan oin nee relasaun nasaun rua nee sei forte liu tan,” dehan PM Xanana.
Jornalista: Alberto Menezes
Editora: Carme Ximenes
