VEMASI, STLTIMORLESTE.com – Ular lakataru hahu atake ona komunidade sira nia batar iha Suku Ostiku, Postu Administrativu Vemasi, Munisipiu Baukau.
Toos nain Afonso Faria Freitas hateten, batar neebe iha toos laran kuda iha fulan Novembru 2025 too iha inisiu Dezembru nee ho kondisaun moris buras neebe garante sei fo rezultadu kolleta diak, maibe iha semana liu ba durante udan tuituir malu batar sira hetan estragus, tanba hetan atake husi ular lakataru.
“Batar nee moris diak maibe pesti nee mak estraga, batar iha nee hotu-hotu hanesan deit, nee bele fo impaktu ba ami nia produsaun, tanba ular han ona nia dikin labele sae ona,” Afonso hateten ba STL iha Ostiku, Sesta (19/12/2025).
Nia katak, ular lakataru neebe daudaun estragus batar iha toos laran, nia parte laiha ai-moruk pestisida hodi atua reasaun lakataru iha batar dikin no problema refere nia parte seidauk hatoo ba parte extensionista destakadu Suku Ostiku, tanba la marka prezensa.
Tuir nia, ular lakataru nuudar ular foun neebe foin estragus batar sira iha nia toos laran, tanba nee husu Servisu Munisipal Agrikultura Baukau apoiu ai-moruk pestisida nian hodi atua reasaun ular lakataru.
“Ami agrikultor laiha aimoruk, husu karik iha aimoruk ruma mai rega ami nia batar, hodi pesti nee labele daet tan ba ami nia batar seluk neebe pesti nee seidauk kona,” nia sujere.
Iha sorin seluk Extensionista Destakadu Suku Ostiku, Duarte Barros rejeita informasaun neebe agrikultor dehan nia parte la hakbesik ba toos nain sira iha Suku Ostiku, tanba kuaze kobre ona komunidade sira nia toos iha Suku Ostiku no deteta batar sira neebe ular lakataru estraga husi toos barak.
“Aimoruk ba lakataru nian laiha, ami lori aimoruk hare nian ba rega mos la mate. Tinan-tinan hau ba hatoo iha neeba mos aimoruk oho lakataru laiha,” Duarte argumentu.
Extensionista nee katak, problema refere nia parte hatoo ona ba Servisu Munisipal Agrikultura Baukau, maibe labele responde, tanba aimoruk atu hamate ular lakataru nian laiha.
Nunee hanesan tekniku agrikultura husi Ministeriu Agrikultura, Pekuaria, Peskas, no Floresta (MAPPF) iha baze hakbesik aan ona ba toos nain sira, koko atua ho aimoruk pestisida hare nian ba ular lakataru neebe estraga komunidade sira nia batar, maibe labele responde, tanba ular lakataru la mate mantein estraga komunidade sira nia batar iha toos laran.
“Nee fo ona impaktu ba komunidade sira nia produsaun, tanba batar mate nia isin laiha ona. Hau hanesan extensionista fo hanoin ona ba sira uza tabaku tahan ho So Clean maibe balu mate, balu la mate, nafatin deit,” Duarte katak.
Extensionista nee argumenta, nia parte fo ona apoiu tekniku tradisional hanesan deut tabaku tahan kahur ho rinso no bee rega ba batar sira, no konsege hamate ular lakataru balu, maibe la atinji diak, tanba ular refere kuaze alastra ona batar barak.*
Jornalista: Tomas Reis
Editora: Carme Ximenes
