DILI, STLTIMORLESTE.com – Prezidente Tribunal Rekursu (PTR), Afonso Carmona hatete, kona-ba konstitusionalidade ba revogasaun Lei Pensaun Mensal Vitalisia (LPMV) iha hela prosesu elaborasaun husi Juiz sira iha Tribunal antes fo sai ba Publiku.
Nia dehan, konstitusionalidade Lei Pensaun Mensal Vitalísia iha prosesu elaborasaun husi Juiz sira iha Tribunal remata sei anunsia ba publiku, tanba nee nia labele koalia beibeik ida nee, tanba sei iha prosesu nia laran, tuir regra Tribunal nian no la iha tan diskusaun polítika, tanba regra prosesu ida nee iha Juiz Titular nia responsabilidade.
“Hau hanoin hau koalia tan ida nee dala haat ona imi la komprende, hau labele koalia bebeik buat neebe hanesan, hau dehan buat ida prosesu tuir regra tribunal nia nee ita labele komentariu laiha tan atu ba deskute hanesan politiko akordo nee tanba nia regra prosesu nee juis Titular mak kaer tanba nee mak hau koalia bebeik ida nee, tanba nee hau halo serimonia solene nee para akompanha serbisu tribunal hanesan nee estadu nia serbisu lao hanesan nee lori imi ba komprende situasaun tomak mais imi lori hau ba konflitu imi hanoin estudante ba nee atu reuniaun atu diskusaun ita lahalo ida nee tanba prosesu nee ketak lahanesan,” dehan PTR, Afonso Carmona ba Jornalista sira, bainhira remata enkontru ho PR, iha Palasiu Prezidensial, Nicolau Lobato, Dili, Sesta (19/12/2025).
Konstitusionalidade ba LPMV tuir Afonso nia prosesu kontinua lao, tanba nee nia parte labele resposta ba publiku nia ezijensia kona-ba determinasaun loron, tanba Prosesu lao.
“Tanba nee maka imi nia preokupasaun bainhira maka hotu, ita bele dehan semana oin bele hotu, depende ba prosesu kontraditoriu, prosesu tama sei fo hatene fali, no sita ba Ministeriu Publiku para halo nia komentariu parte hotu tama ona maka ita foin deside,” hatete Carmona.
Afonso sublina Nia parte labele termina tempu ba desizaun Lei Pensaun Mensal Vitalísia, tanba prosesu elaborasaun nee Juiz nia responsabilidade laos Prezidente Tribunal rekursu nia responsabilidade.
Bazeia ba ezijensia estudante Universitariu Timor-Leste (EUTL), neebe deskobre katak Juiz neebe maka halo elaborasaun ba prosesu ida nee hanesan mos benefisiariu husi Lei Pensaun Mensal Vitalísia, Prezidente Tribunal Rekursu dehan, nee la loos. Tanba buat hotu bazeia ba prinsípiu sira justisa nian, bainhira sira la trata prosesu refere maka konsidera hanesan krime. No Estudante sira nia preokupasaun PTR dalabarak dehan hanesan nee krítika asaun sira nee hanesan kontrolu sosial, laos atu influensia desizaun Tribunal, kontrolu sosial nee mak loke ka aberta. No prosesu elaborasaun nee la iha interese ruma tanba bazeia ba prinsípiu
Nia hatutan, tuir lo-loos tenke husu mos ba Provedoria Direiru Umanu (PDHJ) nia pensamentu razaun saida maka haruka fali ba iha Tribunal, tanba Lei nee aprova iha Parlamentu Nasional, no haruka ba Prezidente Republika hodi promulga, tanba nee Tribunal presiza informasaun hotu-hotu atu halibur dadus hodi diside. Pozisaun atu dialogu ho estudante sira seidauk bele atu koalia, tanba haree mos ba regra no andamentu sira.
Jornalista: Emerenciana Pinto
Editora: Carme Ximenes
