BAUKAU, STLTIMORLESTE.com – Kompanhia lokal balu neebe Ministeriu Obras Publikas kontratu, besik tinan ida ona abandona projetu reabilitasaun estrada iha Suku Samalari, Postu Baukau Vila, Munisipiu Baukau.
Deklarasaun nee hatoo husi kondutor transporte publiku diresaun Samalari Baukau, Francisco da Costa Ximenes ba STL, iha Samalari, Segunda (22/12/2025).
“Estrada ida nee besik tinan ida ona mais servisu nuunka lao sira kee tiha dalan nee ami tula pasajeiru lao ba mai la diak, dala ruma udan bee nakonu tiha nia abandona ba tiha deit,” dehan Francisco.
Francisco sublina, projetu estrada refere responsabiliza husi nain ba kompanhia Baukau oan ida, neebe hahu implementasaun servisu mobiliza nia pezadu kuaze loke luan estrada liu husi kee bee dalan hanesan valeta no ponte kiik, maibe parte kompanhia la konstrui no taka metin ponte kiik hamutuk unidade 2 neebe iha, hodi rezulta bee nalihun iha fatin fo impaktu ba movimentasaun komunidade sira ho transporte publiku no privadu, tanba labele liu.
“Nee Paulino Lamegua nia kompanhia, nia responsabiliza ba kilometru 2 husi area Buibau nian too Samalari nian, fo difikuldade ba ami tula pasajeiru sira udan makaas lao la diak, tanba sira abandona duni,” katak Francisco.
Iha fatin hanesan pasajeiru Maria Ximenes Marçal mos preokupa ho projetu reabilitasaun estrada refere, tanba liu tinan ona ida kompanhia abandona servisu.
“Estrada nee nuunka iha kondisaun atu lao liu husi nee iha tempu udan la diak, tanba udan makaas bee sae tahu mos makaas, tanba kompanhia la taka lalais, kompanhia abandona projetu nee tinan ida fulan 2,” Maria informa.
Pasajeiru nee husu ba Ministeriu Obras Publikas atu fo presaun ba kompanhia responsabiliza projetu refere, nunee bele kontinua halao servisu hanesan reabilita estrada, hodi fasilita movimentasaun transporte publiku no privadu diresaun Samalari Baukau Vila.
Liga asuntu nee jornalista STL tenta konfirma nain ba kompanhia responsabiliza projetu reabilitasaun estrada refere iha nia akampamentu Samalari, maibe laiha fatin atu fo komentariu.
Jornalista: Tomas Reis
Editora: Carme Ximenes
