DILI, STLTIMORLESTE.com – Jurista Sergio dias Quintas hatete, iha tinan 2025 setor justisa iha mudansa ona, tanba nee espera iha tinan 2026 implementa ona Lei Organizasaun Judisiaria, atu fo apoiu justisa ba povu sira iha munisipiu.
“Ita espera katak iha tinan 2026 estadu Timor Leste bele implementa ona Lei Oganizasaun Judisiaria nee ho diak, ho nunee bele fo justisa ba povu iha munisipiu sira nee para sira labele gasta osan mai buka justisa iha kapital, tanba lei organizasaun judisiariu nee atu estabelese Tribunal sira iha munisipiu hotu,” dehan Jurista Sergio ba STL iha Kaikoli, Dili, Segunda (22/12/2025).
Tanba tuir Jurista nee nia haree setor justisa iha mudansa em termos infraestrutura fizika no rekursu humanu iha progresu, mesmu ke iha obstakulu no dezafiu, maibe fazeadamente konsege rezolve buat balu hanesan numeru Majistradu Judisial no Ministeriu Publiku (MP) komesa sae, infraestrutura komesa iha mudansa kompara tinan hirak ba kotuk.
Iha fatin ketak, Prezidente Tribunal Rekursu, Afonso Carmona deklara, sei implementa Lei Organizasaun Judisiariu, maka estabelese Supremu Tribunal Justisa, no estabelese Tribunal iha Munisipiu haat.
“Sei estabelese STJ, no sei hari mos Tribunal iha Munisipiu, Ermera, Maliana, Viqueque, no sei hadia mos Tribunal Baucau nian,” dehan PTR, Afonso.
Nia dehan, hari Tribunal iha Munisipiu hanesan pasu ida, atu lori justisa hakbesik ba iha komunidade sira, no mos atu redus kazu pendente neebe iha.
Jornalista: Terezinha De Deus
Editora: Carme Ximenes
