BAUKAU, STLTIMORLESTE.com – Komunidade Suku 2 iha Postu Administrativu Vikeke Vila, Munisipiu Vikeke afeta ba inundasaun, tanba kauza husi udan boot.
Komadante Autoridade Protesaun Sivil Munisipiu Vikeke, Cerilo Soares Gomes esplika, inundasaun refere akontese iha loron 22 Dezembru 2025 parte loraik kuaza husi udan ho durasaun oras ida resin, neebe udan been nakonu mota hodi afeta ba komunidade sira nia uma hela fatin, tanba bee sae besik too metru ida.
“Hafoin akotese ekipa ba kedas fatin konsege identifika hamutuk uma kain 21, depois orsida sei kontinuasaun,” Cerilio informa ba STL liu husi telefone, Tersa (23/12/2025).
Nia sublina, provizoriu ekipa Autoridade Protesaun Sivil Munisipiu Vikeke identifika komunidade sira neebe afeta inundasaun hamutuk uma kain 21 no la rezulta lakon vida no kanek, maibe komunidade sira nia sasan uma laran, kompostu husi sasan eletroniku no seluk tan kuaze hetan estragus.
Nia fundamenta, komunidade uma kain 21 neebe ekipa Autoridade Protesaun Sivil Munisipiu Vikeke identifikadu, tuir planu iha loron 23 Dezembru nee sei fo apoiu emerjensia kompostu husi hahan no laos hahan. No tuir planu sei kontinua halo identifikasaun ba komunidade sira seluk, tanba inundasaun refere afeta ba komunidade Aldeia 2 iha Postu Vikeke Vila.
“Ida husi Suku Bahalatauia, parte Aidaak no Aldeia Kailoi parte Uma Uain Kraik,” Cerilio akresenta.
Komandante Autoridade Protesaun Sivil Munisipiu Vikeke nee husu ba komunidade sira neebe hela besik iha fatin risku sira hanesan mota ninin, atu nafatin atensaun liu husi muda sasan ba fatin seguru no kuida aan, nunee bainhira udan boot akontese rezulta udan been nakonu mota, hodi afeta ba uma hela fatin la estraga. sasan sira no seluk tan.
Jornalista: Tomas Reis
Editora: Carme Ximenes
