DILI, STLTIMORLESTE.com – Prezidente Republika (PR), Jose Ramos Horta hatete, natal tempu sagradu no tempu ida neebe hanoin hikas kona-ba mensajen forte ba umilde moris foun iha Belem.
Dehan Prezidente Republika, Jose Ramos Horta liu husi mensajen Natal, iha Palasiu Prezidensial, Tersa (23/12/2025). Xefe Estadu dehan, natal tempu sagradu, no loron importante nee kosok oan Jesus lori pas ksolok ba ema hotu iha Timor Leste nomos mundu.
“Povu doben Timor Leste, ho kmanek Natal nian neebe too ona mai ita nia nasaun, Hau hatoo hau-nia votus kmanek no laran luak tebes ba imi hotu. Hein katak tempu nee lori ba imi pas, ksolok no esperansa neebe metin ba nafatin. Natal mak tempu sagradu ida, tempu neebe fuan sira iha mundu tomak hanoin hikas kona-ba mensajen forte ba humilde moris foun iha Belem, mensajen ida kona-ba naroman iha nakukun laran, kona-ba pas envez de konfrontu, no kona-ba domin ba malu,” dehan Prezidente Republika, Horta.
Prezidente Republika dehan, mensajen nee koalia klean kona- ba ema nia istoria rasik no espíritu kolektivu. “Ita mak nasaun ida-neebe lao tempu naruk iha nakukun laran, matadalan husi naroman fiar no esperansa nian neebe metin ba loron foun ida neebe diak liu.
Loron-foun ida nee mak ita-nian atu harii hamutuk, loron-loron,” hatete Xefe Estadu.
Nia sublina, iha tinan 2025 nia laran, kontinua viajen nuudar povu ida deit, hasoru dezafiu sira ho reziliensia no selebra progresu ho unidade.
“Nuudar imi-nia Prezidente, hau nia orasaun Natal nian neebe boot liu maka atu unidade nasional no pas neebe dura sai ita-nia fundasaun neebe metin. Mai ita fo liman ba sira neebe sente mesak, ajuda sira neebe presiza, no simu ema hotu ho laran nakloke nee mak espíritu loloos Natal nian. Ba Timor Leste nia oan sira, neebe sira-nia ksolok hakonu ita-nia uma laran: hein katak imi nia hamnasa kontinua sai lian ba ita-nia nasaun nia promesa. Imi mak ita-nia prezente boot liu hotu no ita-nia futuru. Ba ita-nia ferik no katuas sira, neebe lori matenek ba ita-nia viajen naruk atu imi hetan onra no haleu ho domin no respeita. Ba família timoroan ida-idak: atu imi-nia uma sira hetan bensaun kmanek hamutuk no gratidaun neebe klean,” dehan nia.
Xefe Estadu hatutan, iha tempu ksolok nian ida-nee, mai hamutuk halo orasaun besik liu ba sira neebe lori todansira neebe moras, sira neebe luta, no sira neebe triste tanba lakon ema neebe sira hadomi. Espera katak sira hetan konfortu iha sira nia komunidade nia hamutuk no forsa foun iha esperansa neebe maka tempu ida-nee reprezenta.
“Bainhira ita haree ba Tinan Foun, mai ita lori ba oin naroman Natal nian. Husik ida-nee orienta ita-nia asaun sira ba justisa neebe boot liu, kompaixaun neebe klean liu, no dezenvolvimentu sustentavel ba ema hotu. Hamutuk, mai ita kontinua harii Timor Leste ida neebe sidadaun ida-idak bele moris iha dignidade no pas nia laran,” katak Horta.
Iha biban nee Prezidente Republika hatoo deseza ba hotu hotu natal ida neebe nakonu pas kristu nian neebe klean, no Tinan Foun 2026 neebe nakonu ho saude, prosperidade, no susesu komum, Maromak haraik bensaun ba ema ida-idak, no Maromak haraik bensaun ba Timor-Leste. Boas Festas Natal, Feliz Natal, Merry Christmas.
Jornalista: Emerenciana Pinto
Editora: Carme Ximenes
