DILI, STLTIMORLESTE.com – Embaixador Foun Estraordinariu no Plenipotensiariu Republika Demokratika Timor-Leste ba Republika Portugal, Manuel António Araújo Serrano halao audiensia hodi despede no rona orientasaun husi Primeiru-Ministru (PM) Kay Rala Xanana Gusmão, molok halao misaun diplomatika iha Portugal.
Orientasaun nee embaixador Manuel Serrano rona direta atu fo kontinuidade ba servisu hotu-hotu neebe embaixada ho embaixador sira anterior halao ona.
“Hau hetan oportunidade diak mai kumprimenta no despede Primeiru Ministru hodi rona mos orientasaun balun atu fo atensaun ba programa estratejiku kooperasaun neebe Timor-Leste ho Portugal asina ona, liu-liu programa sira ba 2024 no 2028. Hamutuk ho ekipa tomak iha embaixada sei fo atensaun ba komunidade Timorense iha Portugal,” hatete Manuel Serrano iha Palasiu Governu, Tersa (23/12/2025).
Programa estratejiku sira neebe iha ona haree liu ba area edukasaun, justisa, seguransa, defeza ho ekonomia azul inklui buat sira neebe hakerek ona iha akordu estabelesidu.
Prezidente Republika (PR) Jose Ramos-Horta fo pose ba Manuel António Araújo Serrano nuudar Embaixadór Foun Estraordinariu no Plenipotensiariu RDTL ba Republika Portugal iha Palasiu Prezidensial Nicolau Lobato, iha loron 27 Novembru 2025.
Manuel Serrano nuudar distintu diplomata ho ninia karreira inklui knaar signifikativu sira iha fundasaun no mos iha Governu, tanba serví ona nuudar Prezidente “Fundasaun Xanana Gusmão” husi tinan 2002 to’o 2006.
Nia mos sai hanesan Xefe Gabinete ba Ministru Seniór no Ministru Negósiu Estranjeiru no Kooperasaun, José Ramos-Horta hosi tinan 2006 too 2008, Diretór bá Komisaun Amizade no Verdade (CAV) entre Timor-Leste no Indonézia, nuudar mos Konsul-Jerál RDTL nian iha Denpasar, Bali (2006-2008).
Manuel Serrano ho kargu diplomatiku as-liu maka nuudar Embaixador Estraordinariu no Plenipotensiariu Republika Demokratika Timor-Leste nian ba Repúblika Indonezia husi tinan 2009 too 2016.
Embaixador Manuel Serrano nuudar mos Diretor-Jeral SNI iha Gabinete Primeiru-Ministru (2017-2021) no servisu nuudar Konselleiru ba Vise-Primeiru-Ministru no Ministru Koordenador Asuntu Sosial no Asuntu Ekonomiku husi tinan 2023 too 2025.
Relasaun bilateral entre Timor-Leste ho Portugal nuudar parseria profunda no multifasetadu, ho abut iha istória, lian, no kultura neebe parthilada.
Ligasaun ida-nee reforsa husi akordu bilateral 77 no programa kooperasaun estratejika ida neebe ativu dezde 2011.
Portugal fo apoiu indispensavel iha setor krítiku sira hanesan edukasaun, justisa no defeza, kombina ho dialogu politiku ho nivel aas no konsistente, halo Timor-Leste sai parseiru internasional ida neebe vital no sustentavel-liu.
Jornalista: Alberto Menezes
Editora: Domingas Gomes
