BAUKAU, STLTIMORLESTE.com – Iha parte loron 24 Dezembru 2025 antes Misa Kalan Natal, joven balu iha Postu Administrativu Venilale, Munisipiu Baukau, atake malu liu husi asaun tuda malu.
Administrador Postu Venilale, José Freitas Boavida haktuir, asaun nee akontese bainhira realiza jogu futebol kontinuasaun husi 28 Novembru Cup no fulan Dezembru 2025 parte Komisaun Organizador nafatin inisia jogu refere neebe kompete entre bairru, maibe iha loron 24 Dezembru nee mosu diskuidu too joven sira tuda malu, tanba kauza husi dezisaun arbitrajen.
“Kona-ba akontesimentu nee sira tuda malu oituan mais ami normaliza tiha, nee kauza husi jogu, jogu nee horiseik klubu ida neebe karik hau mos too tarde,” José Freitas Boavida informa ba STL liu husi telefone, Kinta (25/12/2025)
Asaun tuda malu refere besik durasaun minutu 5 iha area kampu besik edifisiu Eskola Santa Maria Mazzarello Venilale no la kleur Autoridade Postu no Polisia Eskuadra Postu Venilale too kedas fatin hodi normaliza situasaun.
Nia sublinha, asaun tuda malu refere parte Autoridade Postu seidauk hetan rezultadu klaru husi Polisia Eskuadra Postu Venilale, tanba sei iha faze investigasaun.
“Horiseik ami monitoring seidauk konfirma klaru kazu nee ninia kronolojia loloos, agora moos lao nafatin, situasaun lao normal, Venilale hodi kalan too ohin hakmatek,”
Nia komenta, mezmu iha loron 24 Dezembru 2025 parte loron mosu atake malu iha area Venilale Vila, maibe la afeta ba misa natal kalan, tanba sitausaun lao kontroladu too loron 25 Dezembru parte dader.
Liga ba asuntu nee STL mos tenta konfirma Komadante Eskuadra Postu Venilale liu husi telefone, maibe la atende.
Jornalista: Tomas Reis
Editor: Xisto Mendonça
