VIKEKE, STLTIMORLESTE.com – Iha loron Natal 25 Dezembru 2025, komunidade hamutuk uma kain 100 resin husi suku tolu (3) iha Munisipiu Vikeke afeta ba inundasaun.
Ofisial Servisu Munisipal Informasaun Mitigasaun ba Dezastre, Francisco José Gomes informa, inundasaun refere kauza husi udan boot neebe akontese iha loron 25 Dezembru 2025, hahu husi tuku 16:00 too 18:00 OTL hodi udan bee nakonu mota Wetuku afeta ba uma komunidade sira husi Suku Bahalarauain kompostu husi area Welaku, Aidaak, Kaninuk, Wetalitua inklui uma komunidade balu iha Suku Luka no Bibileo.
“Horiseik inundasaun Suku 3 nee, ita predisaun liu uma kain 100, tanba tama too Suku 3, hodi kalan komunidade nia deskansa menus liu, tanba bee tama hotu uma. Mota Wetuku luan hela, maibe tembok penahan mota nian nee mak tun liu tiha ona, rai henek sae liu tiha ona,” Francisco informa ba STL liu husi telefone, Sesta (26/12/2025)
Nia sublinha, inundasaun refere la rezulta komunidade sira lakon vida no seluk tan, maibe kuaze sasan uma laran hetan estragus no animal hakiak sira bee lori lakon no impaktu seluk mak komunidade sira labele deskansa iha tempu kalan, tanba bee sae liu metru 1 no volume bee tun iha tuku 01:00 parte madrugada.
Nia fundamenta, husi bee sae liu metru 1 rezulta uma komunidade nian hamutuk unidade 2 monu, tanba ai-rin tohar, no daudaun nee ekipa Servisu Munisipal Informasaun Mitigasaun ba Dezastre husi Munisipiu Vikeke iha ona terenu hein ekipa Autoridade Protesaun Sivil Munisipiu Vikeke atu fo apoiu emerjensia.
Nunee mos nia informa, aleinde komunidade afetadu ba inundasaun husi Suku Luka, Bahalarauain no Bibileo, iha loron hanesan inundasaun afeta mos uma komunidade nian hamutuk 5 iha Suku Uma Uain Kraik neebe daudaun ekipa konjunta iha hela terenu fo apoiu emerjensia kompostu husi hahan no laos hahan.
Liga asuntu nee STL mos tenta komfirma Komadante Autoridade Protesaun Sivil Munisipiu Vikeke liu husi telefone, maibe la atende.
Jornalista: Tomas Reis
Editor: Xisto Mendonça
