DILI, STLTIMORLESTE.com – Xefe Estadu Jose Ramos Horta ezije IX Governu Konstitusional atu servisu badinas iha 2026, nunee bele halo dezenvolvimentu rai laran.
Liafuan nee Prezidente Republika Jose Ramos Horta hatoo ba jornalista sira iha Palasiu Prezidensial Nicolau Lobato, Bairo Pite, Segunda (29/12/2025).
Nia katak, 31 Dezembru Prezidente rasik ho Primeiru Ministru Kay Rala Xanana Gusmão sei halo selebrasaun pasajen 2025-2026, Prezidente fiar 2026 akontesimentu pozitivu barak liu tan sei iha, Primeiru Ministru Australia sei mai vizita TL.
“Nee vizita importante planu kleur tiha ona, ita nia esforsu liu liu Governu nian para 2026 hahu i ezekuta infraestrutura boot para Portu Dili modernizasaun, Zona Porto Dili antigu halo Centro konvensaun no dezenvolvimentu husi Porto Dili too Lecidere no Area Branka. Laos nee deit maibe aprova investimentu neebe mai para halo sentru konvensaun nomos seluk tan, tanba 2026-2027 signifika Governu hela tinan 2 deit para bele kompleta projetu infaestrutura importante ke kontribui ba aranke ekonomia boot. Nee duni 2026 haree no ezije serbisu badinas liu husi parte Governu, no fo apoiu mos didiak ba setor privado,” dehan nia.
Prezidente Republika hatutan, governu tenke haree no konsulta ho internasional ida para mai halo auditoria makaas klean, halo levantamentu klean problema saida, tanba eletrisidade TL hetan orsamentu boot, tinan-tinan haan osan boot maibe la funsiona ho diak.
Iha biban nee Prezidente Republika hatete, se IP-EP sira nee serbisu ladiak lalika tau osan ba, se tau mai iha gaveta Prezidensia Prezidente Republika Jose Ramos Horta hatete nia sei veta iha 2026.
Jornalista: Emerenciana Pinto
Editora: Domingas Gomes
