DILI, STLTIMORLESTE.com – Polisia Nasional Timor Leste (PNTL) asegura joven nain 20 iha loron Natal, tanba konsumu tua no halo konflitu iha bairu laran.
Komandante Polísia Nasionál Timor-Leste (PNTL) Munisípiu Díli, Superintendente Xefe Polísia, Orlando Gomes dehan, durante selebrasaun natal PNTL kaptura no detein joven hamutuk ema nain 20.
“Ami kaptura no detein joven sira neebe mak konsumu tua, no balun neebe mak halo konflitu iha bairru laran hamutuk ema nain-20,”hatete Komandante PNTL Munisípiu Díli, Superintendente Xefe Polísia, Orlando Gomes ba jornalista sira iha CCD, Segunda (29/12/2025).
Nia tenik, suspeitu nain-20 nee polísia detein iha sela durante oras 12 nia laran depois halo identifikasaun no bainhira iha prova katak balun involve duni iha krime, rekomenda hodi kontinua detensaun oras 72 nia laran hodi kontinua ba iha Ministeriu Públiku (MP).
Nia esplika, operasaun hodi asegura kapital Díli hakmatrk iha selebrasaun natal no tinan foun 2026 nee bazeia ba diretiva operasional husi Komandu Jerál PNTL, hodi prepara nia planu seguransa asegura situasaun.
Nia informa, operasaun no patrollamentu lao ain nee hamutuk ho forsa konjuntu FALINTIL-Forsa Defeza Timor-Leste (F-FDTL), Polísia Militár (PM), forsa espesial sira F-FDTL nian nomos Unidade Espesiál Polísia (UEP), Unidade Polísia Maritíma (UPM) no informasun sekreta hamutuk kontrola situasaun iha kapital Díli.
Komandante Polísia Munisípiu Díli koalia, sira nafatin esforsu hodi asegura joven sira neebe iha bairru balun halo konflitu, autoridade seguransa prevene ba konflitu sira neebe mosu.
“Durante natal iha kazu violensia domestika no joven sira hemu tua halo konflitu iha bairru laran mak hanesan iha Suku Madohi, iha mos Tuana Laran, neebe ita nia opersaun konjuntu husi F-FDTL no PNTL halo prevensaun konsege kaptura suspeitu nain 20,” nia deklara.
Nia koalia, PNTL mos koloka pesoál Unidade Tranzitu no Rodoviáriu iha igreja sira kapital Díli, hodi asegura selebrasaun misa natal nian lao ho diak no ho transkualidade.
Iha fatin ketak, Juventude Bairu 45, Julio Pinto informa, durante selebrasaun natal iha sira nia Bairu 45 Hudi Laran ladun kontente, tanba ema deskonhesidu tuda komunidade nia uma no joven sira hemu tua depois baku malu no halo barulhu.
Jornalista: Jeniche da Costa
Editora: Domingas Gomes
