DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ikus ba kazu Abuzu Seksual, kondena arguidu ho inisial AX pena prizaun tinan 8, tanba komete krime hasoru lezada nain ida.
Iha desizaun nee Juiz prosesu Fransisca Cabral deklara katak, faktus neebe konsta iha akuzasaun iha tolu mak hasoru arguidu, husi faktus tolu nee Tribunal konsidera iha faktus ida maka provadu. No faktus neebe provadu maka dehan, iha loron 24 fulan Maio tinan 2024 iha Hera, arguidu halo abuzu seksual hasoru lezada.
No Tribunal konsidera ida nee provadu, tanba bazeia ba deklarasaun husi lezada, neebe reforsa tan ho deklarasaun husi sasin neebe hanesan lezada nia inan.
Tribunal konsidera, faktus neebe la provadu maka dehan iha loron 14 fulan Abril tinan 2023, no loron 25 fulan Novembru tinan 2025, arguidu halo abuzu ba lezada.
Tribunal deklara, konsidera la provadu, tanba lezada ho nia inan neebe hanesan sasin, sira nia deklarasaun kontradiz ba malu.
Ikus mai Tribunal Kolektivu deklara katak, iha krime tolu maka akuza ba iha arguidu, maibe Tribunal konsidera absolve arguidu husi krime rua.
Nunee kondena arguidu ba krime abuzu seksual ho pena Prizaun tinan 8.
Juiza prosesu mos deklara, arguidu la konkorda ho desizaun Tribunal nian, bele liu husi arguidu nia Defeza hodi halo rekursu, prazu durante loron 30 nia laran.
Tribunal mos deklara, arguidu kontinua iha Prizaun Preventiva, too hein prosesu nee tama iha tranzitu injulgadu.
Desizaun nee, lee sai husi Juiz prosesu Fransisca Cabral, Ministeriu Publiku reprezenta husi Prokurador, Pedro Baptista, arguidu hetan asistensia legal husi Defensor Publiku, Manuel Sarmento.
Jornalista: Terezinha De Deus
Editora: Carme Ximenes
