DILI, STLTIMORLESTE.com – Tribunal Judisial Primera Instansia Dili (TJPID) hatun ona leitura desizaun kona-ba re julgamentu kazu Zizelma Maria Fatima Verdial Gonsalves, neebe hetan soke husi arguidu MSC to ikus la konsege salva vida.
Prosesu refere antes nee iha desizaun primeiru Tribunal Primera Instansia aplika pena prizaun tinan tolu, suspende tinan haat no mos indimiza osan rihun US$ 5 .
Maibe momentu neeba familia la konkorda, hamutuk ho Ministeriu Publiku no mos asistente, hodi halo rekursu hasoru desizaun Tribunal Primera Instansia ba iha Tribunal Rekursu (TR).
Nunee iha loron (26/06/2025) Tribunal Rekursu hasai desizaun ida, hodi notifika ba iha parte sira katak, ba prosesu ida nee TR deside hodi halo re julgamentu fali. Tanba nee iha re julgamentu Tribunal rona sasin nain rua, hare mos CCTV neebe oferese husi Loja Funan Buras ikus mai deside ba iha desizaun.
Desizaun segundu neebe Juiz prosesu Jose Gonsalves foti, maka mantein ho desizaun anterior, hodi aplika pena prizaun tinan tolu (3), no suspende tinan haat (4) ba arguidu, no indimiza ho osan rihun US$ 5.
Tanba nee, Prokurador neebe kaer prosesu refere, kontinua la aseita ho desizaun Tribunal nian, hodi halo rekursu hasoru desizaun Tribunal Primera Instansia nian.
Prokurador refere hatama ona rekursu ba iha TJPID, tanba nee Tribunal mos notifika ona husi parte Defeza arguidu nian, atu resposta kona-ba rekursu neebe hatama husi MP.
Tuir regra neebe iha, Prokurador halo ona rekursu, hein resposta husi parte defeza nian, depois junta hamutuk maka sei haruka ba iha Tribunal Rekursu hodi deside.
Antes nee Ministeriu Publiku (MP), iha alegasaun ba kazu Zizelma Maria Fatima Verdial Gonsalves nia mate iha re julgamentu, husu Tribunal atu kondena arguidu ho inisial MSC.
Iha alegasaun nee Prokurador Rafael Gusmao deklara katak, arguidu hili direitu nonok. Maibe deklarasaun husi testamuna sira, husi autoridade Polisia tranzitu nian katak, arguidu soke vitima iha zebra kros, no motor rasta vitima too ba iha fatin neebe vitima latan ba 8 metru.
MP deklara, sasin Nelia Maria da Roza Verdial De Araujo deklara, rona tarutu sai mai hare vitima latan hela, no sasin Domingos dos Reis Amaral de Souza mos deklara, iha karreta ida fo dalan vitima atu liu, maibe arguidu halai ho velosidade makas ikus mai hodi soke vitima, lori to ba iha hospital maibe la salva.
MP deklara, video CCTV neebe oferese husi Loja Funan Buras hatudu katak, arguidu halai ho velosidade makas, hodi ikus mai soke vitima mate.
Tanba nee MP haree katak, maski arguidu hili direitu nonok, maibe bazeia ba deklarasaun husi Polisia Tranjitu nian, no sasin nain rua nian, MP haree katak provadu arguidu komete krime neebe MP akuza ba.
Tanba nee MP la iha duvidas, no haree katak aktu arguidu nian primeiru konduz motor la ho kuidadu, segundu arguidu ultrapasa karreta hodi soke vitima, terseru motor neebe arguidu uza xapa matrikula motor seluk nian. Tanba nee MP husu Tribunal atu kondena arguidu pena unika prizaun tinan 5.
Enkuantu iha alegasaun nee, Asistente Eustaquio Guterres deklara katak, arguidu hanesan foin sae ida konduz motor la ho kuidadu. No arguidu soke tiha vitima mate, iha sala julgamentu arguidu hili direitu nonok, no arguidu la deklara arependementu.
Asistente deklara, arguidu soke tiha vitima depois arguidu halai, autoridade seguransa maka kaer fali arguidu, no arguidu soke vitima iha kedan zebra kros.
Tanba nee asistente husu Tribunal, atu kondena arguidu pena prizaun tinan 6. Konaba indimizasaun asistente koalia ona ho familia sira, maibe familia sira la aseita, tanba nee husu Tribunal maka tetu.
Enkuantu Defeza arguidu nian, Americo iha alegasaun deklara katak, la iha opozisaun konaba alegasaun husi Ministeriu Publiku no asistente nian. Maibe Defeza husu Tribunal atu hare deklarasaun sira hotu husi inisiu kedan, hodi bele tetu no foti desizaun.
Prosesu nee, prezinde husi Juiz Jose Gonsalves, Ministeriu Publiku reprezenta husi Prokurador, Rafael Gusmao no asistente Eustaquio Guterres no arguidu hetan asistensia legal husi Advogadu Privadu, Americo.
Jornalista: Terezinha De Deus
Editora: Carme Ximenes
