AMBENO, STLTIMORLESTE.com – Komandante Jeral Polisia Nasional Timor Lorosae (PNTL), Komisariu Jeral Polisia Henrique da Costa, hamutuk ho Presidente Autoridade Rejiaun Administrativu Espesial Oecusse Ambeno (PA-RAEOA), Regio da Cruz Salu nomos Komandante Interino PNTL Reional Oecusse, Superintendente Asistente Polisia Angelo Quelo, ofisialmente entrega Motorizada 18 ba Membru Ofisial Polisia Suku (OPS) iha Komandu PNTL RAEOA.
Serimonia entrega veikulus Motorizadas 18 ba membru OPS sira nee hahu ho simu Komandante Jeral PNTL, Komisariu PNTL no PA-RAEOA ho Drumband husi Estudante Eskola Sekundariu Padiae, neebe organiza husi Inspektor Polisia Helder, nunee katuas lia nain sira husi Suku Costa simu bainaka ho lia dadoli (Takanab), kontinua kedan ho hatais Komisariu PNTL ho espoza tuir kultura Oecusse, tara tais no tama ba fatin serimonia hodi hahu serimonia entrega veikulus Motorizadas ba membru OPS.
Tuir Komandante Jeral PNTL, Komisariu Polisia, Hendrique da Costa ba STL iha Kuartel Jeral PNTL Rejional Oecusse, Sabadu (27/12/2025) dehan, Motorizada hirak nee entrega ba OPS sira Bazeia ba rezolusaun Governu Nu 31/2025, 02 de Julhu neebe durante utiliza hodi apoiu servisu OPS nian ho durasaun tempu tinan 10 resin hodi apoiu halo serbisu, mesmu ba kotuk motorizadas sira nee sai patrimonio estadu ninian, maibe manutensaun membru OPS sira maka hasai osan hodi hadia inklui konbustivel.
“Ohin entrega ona motorizada sira nee ba ita boot sira maibe Komandu sei hasoru nafatin obstaklu barak maka hanesan Transporte, radio Komunikasaun, rekursu humanu no infraestrutura (edifisiu), tanba nee Komandu nafatin husu ba membru (OPS), sira atu utiliza nafatin motorizada hirak nee, hodi hatutan imi nia ain hodi hakbesik aan nafatin ba ita nia Komunidade sira. Sei ita boot simu ida nee ba para loos deit, ita boot sira hein los deit ba iha komandu hodi fo fila-fali motorizada no kareta foun hodi halao servisu, Hau garante katak tinan hirak mai oin, nafatin mos ita seidauk bele responde no mais pior liu tan enves kria servisu OPS nee besik ba Komunidade lae mais nia bele kria fali distansia ida neebe dook ho ita nia Polisia ho komunidade sira, tanba asuntu ida ohin hau dehan transporte Ninian, uza nafatin hanesan meus ida hodi hatutan imi nia ain, atu nee imi bele halao aktividade sira hamutuk ho ita nia komunidade, liu-liu Xefe Suku sira, Hateten Komandante Jeral PNTL, Komisariu Polisia, Hendrique da Costa.
Nia dehan, atividades doasaun motorizada ba membru OPS sira, realiza ona iha munisipiu sira seluk, maibe iha RAEOA, foin maka realiza.
Nunee mos Prezidente Autoridade RAEOA, Regio da Cruz Salu sente haksolok tebes, tanba iha ambitu natal 2025 no prepara atu simu Tinan foun 2026, Oecusse bele hetan akompanhamentu husi Komandante Jeral PNTL, Komisariu Polisia Hendrique da Costa hamutuk ho komandante sira husi nasional neebe akompanha husi espoza sira hotu, mai Oecusse hamutuk ho povu Oecusse haksolok hamutuk iha prezensa kosok oan Jesus Kristu iha festa natal tinan 2025 no prepara simu tinan foun 2026.
“Premite hau atu hateten katak, ami nia mandatu ohin kompleta fulan 4 iha Oecusse nuudar PA-RAEOA ho Estrutura Diretor Rejional Sira hotu nomos Koordenador Zona Ekonomia Espesial ba Dezenvolvimentu Oecusse-Ambeno, periodu tranzitoriu estrutura RAEOA no extende tan ba tinan oin iha fulan Dezembru tinan 2026, maibe serbisu la signifika tenke tinan ida tan, serbisu nee tenke lalais atu nunee ita bele haree buat balun ke valoriza povu ninia sakrifisiu,” dehan PA-RAEOA, Regio da Cruz Salu liu husi ninia deskursu.
Iha biban nee, Komandante Interino PNTL Rejional Oecusse, Superintendente Polisia, Angelo Quelo, hatoo benvindu ba Komandante Jeral PNTL, Komisariu Polisia Hendrique da Costa ho komitiva ho komitiva mai Oecusse no ohin halao serimonia distribuisaun motorizadas ba membru OPS sira hamutuk 18 iha Oecusse.
“Hau lori Komandu Polisia Rejional Oecusse, hatoo benvindo ba Komandante Jeral PNTL, Komisariu Polisia Hendrique da Costa ho komandante Investigasaun PNTL, Reprezentante Ministru Interior mai Oecusse, hodi ofisialmente entrega motorizadas ba membru OPS sira hamutuk 18 neebe maka halao ona sira nia knaar kuaze tinan 10 resin ona, tanba nee hahu ohin ba oin, motorizadas hirak nee sai nain ba membru OPS sira,” dehan nia.
Nia haktuir tan katak, motorizadas hirak nee entrega iha tinan 2014 no durante nee membru OPS sira maka uza hodi halo serbisu, tanba nee governu deside entrega motorizadas sira nee ba membru OPS sira, tanba durante nee sira maka uza no sira maka kuidadu, ate motorizadas sira nee bain hira aat, sira maka hadia rasik, neebe ohin governu entrega ba sira nuudar nain ba motorizadas hirak nee.
Iha Serimonia nee partisipa husi Xefe Diretur Diresaun Servisu Investigasaun Kriminal Superintendente Polisia, João dos Reis Belo, Komandante PNTL Interino RAEO Superintendente Assistente Polisia, Angelo Quelo ho Strutura Komandu PNTL Oecusse, FALINTIL-Forsa de Deveza de Timor-Leste (F-FDTL) destakadu iha Oecusse, Presidente Autoridade Rejiaun Administrativa Espesial Oecusse Ambeno, Regio da Cruz Salu, Pe. Mariano Neto de Carvalho, Reprezenta Ministeriu do Interior, Presidente AESPNTL, Manuela de Araujo ho Strutura Kordenadora AESPNTL Komandu Munisipiu, Xefe Suku 20 iha Oecusse ho membru KPK.
Jornalista: Joseph Koa
Editor: Joseph Koa
